Lurraldebusen E02 linea, 2026an erabiliena
Aldundiak 2026aren lehen erdian Lurraldebusen lineen erabiltzaileen zenbatekoak eman ditu. Oiartzun eta Donostia lotzen dituenak izan ditu bidaiari gehien.
Gipuzkoako Foru Aldundiak, Azahara Dominguez Mugikortasuneko, Turismoko eta Lurralde Antolaketako diputatuaren bitartez 2026ko lehen sei hilabeteetan Lurraldebusen zerbitzuek edo lineek zenbat bidaiari izan dituzten jakinarazi du. Osotara, urtarriletik ekainaren bukaerara Lurraldebusen linea guztiek hamasei milioi bidaiari izan dituztela jakinarazi du Dominguezek, eta 2025eko epe horrekin alderatuta %6,18 hazkundea izan dela erabiltzaileen kopuruan. Hala, Gipuzkoan Lurraldebusek dituen linea guztien artean erabiliena E02 (urriaren 1etik OR02 izena du) izan da 2026ko lehen sei hilabeteetan: 876.449 erabiltzaile izan ditu Oiartzun eta Donostia batzen dituen zerbitzuak.
Aldundiak emandako datuen arabera, aurtengo lehen erdian 5.441.153 bidaiari izan dituzte Oarsoaldean eta Bidasoan Lurraldebusek Ekialdebusen bitartez kudeatzen dituzten lineek. E02aren ondoren, Donibane eta Donostia batzen dituen E01 izan da erabiliena (orain OR01 izena du), 786.164 herritarrek erabili dute. Horren segidan hirugarren erabiliena E05 (Beraun-Donostia) izan da, 694.985rekin; egun OR03 da linea horren izena. Irun eta Hondarribia abiapuntu dituzten lineen gaineko daturik ez du eman aldundiak.
Datu horien irakurketa egiterakoan kontuan hartu beharrekoa da Ekialdebusen zerbitzuek Oarsoaldeko herriak nahiz Irun eta Hondarribia Donostiarekin batzen dituztela, eta lineen hasierako eta bukaerako geltokien artean herriz herri bidaiariak hartu eta uzten dituztela tarteko geltokietan.
Dominguezek zehaztu du Gipuzkoako autobus bidezko garraio publikoaren bidaiarien hazkundeari aurre egiteko 68,4 milioi euroko aurrekontua bideratu zaiola Lurraldebusi aurten, eta ibilgailuen flota 262tik (iazko abenduko datua da) 268ra hazi dela.
