Biblioteken Egunaren harira jarduera sorta Aldakoenean eta Lekuona Fabrikan
Aldakonea eta Lekuona Fabrikako liburutegiek hainbat jarduera antolatu dituzte Biblioteken Eguna dela eta; hilaren 24an ospatzen da egun hori.
Aldakonea eta Lekuona Fabrikako liburutegiek hainbat jarduera antolatu dituzte Biblioteken Eguna dela eta; hilaren 24an ospatzen da egun hori. Egitarauak helduentzako eta haurrentzako euskarazko ipuin kontaketak eta irakurketa sustatzeko proposamen berezi bat bilduko ditu.
Antolatutako jardueren artean, hilaren 21ean, asteazkenean, Hitzen lapurra helduentzako ipuin kontaketa eskainiko du Dorleta Kortazarrek, euskaraz, Lekuona Fabrikan, 18:30ean. Saio honetan, hitzak izango dira kontakizunaren ardatza. Maitatzeko, sendatzeko eta ikasteko hitzik gabe geratu den herri baten istorioa kontatuko du Kortazarrek, kantuen eta ipuinen bidez.
Otsoko eta Xixili ipuin kontaketa musikatuaz gozatzeko aukera izango dute 4 eta 8 urte bitarteko haurrek, Aldakonean, 17:30ean hasita, berriz, hilaren 23an. Euskarazko saioan, propio sortutako bertso sorta musikatuak tartekatuko dira. Xixili herrian bizi den neska abenturazalea da, eta egunak animalien atzetik igarotzen ditu, txano gorria jantzita, lupa eskuetan eta motxila kristalezko potoz beteta. Otsokume, berriz, basoan bizi da, eta otso nagusiak animalien bila bidaltzen du egunero. Ipuinak bi pertsonaia horien arteko topaketa kontatuko du.
Bi ipuin kontaketetan parte hartzeko, aldez aurretik izena eman beharko da online (klik hemen), Lekuona Fabrikan edo Aldakonean. 943 44 96 35 telefono zenbakira deituta ere egin daiteke.
Itsu-itsuan interesgunea jarriko dute martxan halaber, Errenteria-Oreretako bi udal bibliotekek. Bi astez egongo da eskuragarri, eta liburuak mailegatzeko modu original bat proposatuko du. Liburuak paperean bilduta egongo dira, eta, beraz, ezin izango da ez azala ikusi, ezta barruko edukia ezagutu ere. Irakurleek, horrela, liburu bat aukeratzeko ohiko modua alde batera utzi eta ezustekoaren aldeko apustua egin beharko dute.
Liburutegiko jardueretan izena emateko aukera
Azkenik, liburutegiek gogorarazi dute oraindik plaza libreak daudela antolatzen dituzten hainbat jardueratan, helduentzat zein haurrentzat.
Jarduera horietan izena emateko, aurrez aipatutako bideak erabil daitezke.
