Bizihabi programa Donibanera ekarriko dute
Bizihabiren bidez, adinekoek eta gazteek etxebizitza partekatzen dute. Programaren nondik-norakoak azaltzeko, hitzaldia egingo da hilaren 21ean Juanba Berasategi aretoan, 17:30ean.
Pasaiako Adinekoen Kontseiluaren ekimenez, pasaitarrek Eusko Jaurlaritzaren Ongizate, Gazteria eta Erronka Demografikoaren Sailaren belaunaldien arteko bizitoki partekatuaren Bizihabi programa gertutik ezagutzeko aukera izango dute. Programa horren bidez, adinekoek eta gazteek etxebizitza partekatzen dute, haien ongizatea hobetzeko helburuarekin. Bizihabi programaren nondik-norakoak ezagutzeko, hitzaldia egingo da hilaren 21ean (asteazkena) Donibaneko Juanba Berasategi aretoan, 17:30ean. Sarrera doakoa da, aretoko edukiera bete arte.
Pasaiako Adinekoen Kontseilua udalaren elkarrizketarako gune bat da, Gizarte Zerbitzuek bultzatuta. Pasaiako hainbat eragile biltzen dira kontseilu horretan, kolektibo horren premiei heltzeko eta bizi kalitatea hobetzeko. Hitzaldian izango dira Aintzane Taberna Pasaiako Udaleko lehen alkateorde eta Gizarte Ekintzako zinegotzia eta Adrian Lopez Eusko Jaurlaritzako Gazteria eta Gazteen Emantzipazioko zuzendaria.
“Udaletik, adineko pertsonek beren bizi-proiektuak autonomiaz, laguntzaz eta ongizatez garatu ahal izateko espazioak eta baliabideak sortzen jarraitu nahi dugu. Horretarako, garrantzitsua da gure udalerrian dauden errealitate eta behar desberdinak entzutea eta hainbat aukera haien eskura jartzea. Bizihabi aukera horietako bat izan daiteke, eta hitzaldi honek aukera emango digu programaren funtzionamendua hobeto ezagutzeko, zalantzak argitzeko eta Pasaiako pertsona batzuen beharretara egokitzen ote den baloratzeko”, adierazi du Tabernak.
Irekiera instituzionalaren ondoren, Bizihabiko talde teknikoak, Kuvu erakundekoa denak, programak nola funtzionatzen duen aurkeztuko du, eta gune bat prestatuko du herritarrek zalantzak argi ditzaten.
Bi belaunaldiren arteko bizikidetza
Bizihabiren proposamena da etxebizitzan logela bat duten 65 urtetik gorako pertsonek etxea partekatzea aldi baterako bizitokia bilatzen ari diren 35 urtetik beherako gazteekin, talde teknikoak aurretik azterketa lan bat egin ondoren. Programaren bitartez, bi belaunaldien ongizatea hobetu eta gustukoa ez den bakardadea murriztu nahi dute, bizikidetza osoan zehar belaunaldien arteko harremanak eta laguntza profesionala sustatuz.
Bizihabiko taldeak prozesu osoan zehar laguntzen ditu parte hartzaileak. Lehenik, pertsona bakoitzaren profila erregistratzen du, eta bateragarrienak hautatzen ditu. Ondoren elkarrizketa bat antolatzen du, elkar ezagutzeko eta bizikidetza kontratua formalizatzeko. Azkenik, bitartekaritza zerbitzua erabiliz, etengabeko jarraipena egiten du, eta alokairua kobratzea bermatzen du. Eusko Jaurlaritzak, gainera, zerbitzuaren kostuaren %100arekin laguntzen die diruz baldintzak betetzen dituztenei.
“Bizihabi programak eragin positiboa du gazteengan, aldi baterako ostatu eskuragarriagoa baitute eta adinekoei ere mesede egiten baitie; izan ere, adinekoek diru sarrera gehigarri bat jasotzen dute, gainbegiratutako programa batean elkarri konpainia egiteaz gain. Politika bera gustukoa ez den bakardadeari aurre egiteko lagungarria da, eta etxebizitza eskuratzea errazten du”, baietsi du Lopezek.
2023an Euskal Autonomia Erkidegoan martxan jarri zenetik, Bizihabi programaren bidez 120 bizikidetza kontratu baino gehiago egin dira eta 22.400 gau baino gehiago partekatu dira, aurtengo urrian argitaratutako datuen arabera.
