Bukatu da 'Egin abuztua Pasaian' kanpaina
Materrek eta Laurak Batek sustatuta, bi hilabetez ohiko saltokietara ontzi berrerabilgarriekin joatea animatu dituzte herritarrak. 80 saltokik eta 1.340 lagunek hartu dute parte.
Bukatu da Materrek eta Laurak Batek abuztuan eta irailean zehar sustatu duten Egin abuztua Pasaian kanpaina. Bi hilabetez ohiko saltokietara ontzi berrerabilgarriekin joatea animatu dituzte herritarrak. Kanpainaren helburua izan da hondakinak murriztea eta eguneroko kontsumo erabakiek ere ingurumena zaintzen laguntzen dutela erakustea. Parte hartzea sustatzeko, Materrek 10 plaza bikoitz zozkatu ditu, bere kubiertatik Jaizkibelgo naturagunea nabigatuz ezagutzeko.
Dinamika sinplea izan dela adierazi du Materrek: bezeroak beren ontzi berrerabilgarriekin joaten ziren parte hartzen zuten saltokietara erosketak egitera. Erabilera egiaztatu ondoren, saltokiak QR kode bat ematen zien, eta Laurak Baten aplikazioaren bidez eskaneatuta, Materren nabigazio bikoitz bat zozkatzeko parte hartzea ahalbidetzen zuen. Orotara, 80 saltokik egin dute bat egitasmoarekin, eta 1.340 lagunek hartu dute parte beren ontziak erabiliz.
Atzo itxi zen ofizialki kanpaina, eta erakunde laguntzaile izan diren Laurak Bat, Mater eta Pasaiako Udala elkartu ziren azken ukituak emateko eta tokiko merkataritzaren inplikazioa aitortzeko. Materrek Laurak Bati zozkatutako nabigazio bikoitzen bonuak eman zizkion, eta Laurak Batek berak helaraziko dizkie irabazleei.
Udalak kanpainaren zabalpenean lagundu du, lau barrutietako informazio pantailen bidez. Horien bidez, egitasmoari ikusgarritasuna eman dio udalak, eta mezua herritar guztiei helarazi die.
Kanpaina
Egin abuztua Pasaian Ni Itsas Zaindari kanpainaren barruan kokatuta dago. Tokiko merkataritzari begirako urteroko kanpaina hori Materrek gidatzen du, eta saltokiak itsasoaren zaintzan inplikatu eta jasangarritasun mezuen bozgorailu bihurtu nahi ditu.
Materrek adierazi du merkataritza txikiak “funtsezko” eginkizuna duela aldaketa horretan: “Herritarrekiko hurbiltasunagatik eta sortzen dituen konfiantza zirkuluengatik, ohitura jasangarriagoak sustatzeko leku pribilegiatua da”. Kanpaina baliatuta, Materrek gogorarazi du hondakinak murrizteko bidea eguneroko erabakietatik hasten dela: “Ehunezko poltsa bat eramateak, ur botila bat erabiltzeak edo ontzirik gabe erosteak beharrezkoak ez diren hondakinak saihesten laguntzen du, itsaso osasuntsuago baterantz eta planeta bizigarriago baterantz hurbilduz”.
