Txokolatearen bueltan komunitatea egiten ari dira
Auzoaren Arima Gozoa Azoka egiten ari dira Gurutze Santuaren Plazan. Bertako gozogileen produktuen erakusleiho izango da Lezo 19:30ak arte.
Gozogintza postu bat gaur Lezon, azokaren barruan. Euriak ez du lagundu, baina oztopo ere ez da izaten ari Auzoaren Arima Gozoa Azokak bere bidea egin dezan. Jende dezente batu da plazaren bueltan goiz partetik, bai produktuak ikusi eta erostera, baita tailerretan parte hartzera ere. Haurrei begirakoak izan dira, baina baita helduei begirakoak ere, eta azken horretan txokolate dastaketa egin dute kakao kopurua asmatzeko; proba zaila agian, baina gozoa zalantzarik gabe.
Gaurko azokaren helburua, txokolateaz gozatu eta komunitatea bizitzea, eta horrekin batera, bertako gozogileen produktuak bertatik bertara erakutsi eta dastatzea. 10:30ean zabaldu dute azoka ekitaldi instituzionalarekin.
Bertako produktuak dastatu, tokiko ekoizleak ezagutu, haurrek tailerretan gozatu, eta kalea topagune bihurtu du Auzoaren Arima Gozoa Azokak. Txokolatea aitzaki hartuta komunitatea izan dela gaurko protagonista adierazi du aurkezle lanetan aritu den Olga Grande Kazetariak eta Gozoa azokaren komunikazio arduradunak, “herri bizi baten atzean ez daude eraikinak bakarrik, dendak, tabernak, lantegiak, artisauak, ekoizleak eta herritarrak daude”.
Tokiko merkataritza eta bertako ekoizpena ekonomiaren parte direla jarri du nabarmen, bestalde, “baina baita gure nortasunaren eta eguneroko bizitzaren parte ere. Horregatik, gaur tokikoa ezagutu nahi dugu eta horrekin batera gure herri eta kaleek bizirik jarraitzeko behar dutena balioan jarri ere: ofizioak, ekintzailetza, merkataritza eta pertsonen arteko harremanak”.
Gaurko azoka ofizioei aitortza egin, egiten den lana ikusarazi eta kalea elkargune bihurtzeko baliatu nahi izan dute antolatzaileek.
Jon Legorburu Kultura zinegotziak hartu du hitza ondoren tokiko merkataritzaren gaiak asko kezkatzen dituen gaia dela aitortu du Legorburuk, “gero eta lokal gehiago ixten dira, gero eta zailagoa da lokal berriak zabaltzea, baina Auzoaren Arima proiektua sortu eta zerbait egitea eskaini zigutenean azoka txiki batekin pentsatu genuen eta zerbaitekin goxatu behar genuela”. Hortik sortu zen txokolatearen ideia eta zuzenean hitz egin zutela Gozoan elkartearekin gaineratu du EH Bilduren ordezkariak, “txokolatea eta gozogintza garrantzitsuak direla iruditu zitzaigun, polita dela eta jendea erakartzen duela”.
Lezoko udalaren izenean eskerrak eman dizkie azokara bertaratu direnei, baita beste udalerrietako ordezkari politikoei ere. Tartean aipamen berezia ere Lezoko Salva enpresari, “txokolategi lantegi bat herriko plazan antolatzeko beharrezkoa jarri duelako gure eskura. Lezon errefrente bat da enpresa hori eta eskerrak eman nahi dizkiogu ekarpenarengatik”.
Ez zutela betiko merkatu bat egin nahi gaineratu, gozoa dastatu bai, baina harekin jolastu ere egin nahi zutela. Horren harira, aipamena Legorburuk txikienei begirako tailerrei; horietan 350 haurretik gora eman dute parte hartzeko izena.
Ez dagoela bereziki ederra kalerako baina gozoak emango diela Lezoren bihotzera gerturatzen direnei bertan elkartzeko esan du bere aldetik Aizpea Otaegi Oarsoaldea Garapen Agentziako lehendakariak. Gaurkoaren antzeko ekitaldiek erronka partekatu bat badela jartzen du erdigunean Otaegiren esanetan, “gure udalerriak, gure auzo eta kaleak ahalik eta bizigarrien egitea eta ahalik eta kalitate oneneko biziguneak izatea”. Horretarako, ezinbestekoa jo du merkataritza sendoa edukitzea, eta ekintzaileei bide ematea, “erronka partekatua da hori, ez dagokio soilik herri bati edota eskualde bakarrari. Horretarako dago hain justu Oarsoaldea Garapen agentzia eskualde gisa, Pasaiak, Lezok, Oiartzunek eta Errenteriak partekatzen ditugun erronkei aurre egiteko”.
Auzoaren Arima proiektuari aipamena Otegik, “badelako gure udalerrietako auzo eta kale eta txokoei bizigarritasuna emateko iniziatiba, eta gaurko bezalako iniziatibek horri erantzun nahi diote. Erronka partekatua da, eta ongi dago plazer partekatu batekin ospatzea eta bide ematea”.
Bukatzeko azokarekin eta azokaz gozatzera deitu ditu lezoarrak zein beste herrietatik gerturatzen direnak Otaegik, “eta zorionak Lezori halako iniziatiba antolatzeagatik”.
Azkenik Gozoa elkarteko ordezkariak hartu du hitza. Eskerrak eman ditu Gozoarekin kontatu izanagatik azoka egiteko, “gustu handiz hartzen ditugu halakoak, azken finean, gaur egun, gozoarekin zerikusia duen oro frankiziatua dagoelako, gero eta gozogintza lantegi txiki gutxiago ikusten dira, eta artisau garen neurrian oso kontent gaude jasotako gonbidapenarekin”. Frankiziarik ez, ofizioa dago gaurko azokan diren postu eta produktu gutzien atzean.
Ekitaldiarekin bukatzeko esker ona adierazi die Grandek, Igor Barandiaran Salva Industrial lantegiko zuzendari nagusiari, eta Garbiñe Aizkorreta merkatari txikien ordezkariari, eta Lezokuak elkarteari.
Auzoaren Arimaren logoari keinu txokolategileek, izan ere txokolatera eraman dituzte banan bana logoa osatzen duten eraikinak eta udaletxeko arkupean ikus daitezke pieza horiek; ikusi eta usaindu, txokolate usain ederra sumatzen delako haien inguruan.
Askotariko ekoizle eta artisau bildu dira azokara, Lezokoak zein Oarsoaldeko beste herrietakoak ere. Hala, merkataritza gunean ondokoak izango dira: Aparola (Errenteria-Orereta), behi-, ardi- eta ahuntz-gaztekin; OnEin Kontserbak (Hernani), sagar-marmelada eta gozokiekin; Kuskurro Okintza (Lezo); Zituene (Errenteria-Orereta); eta Versum garagardoak (Oiartzun).
Gozogintza gunean, Gozoa elkarteko kideak dira: Dulces Free (Donostia); Maitiana bonboi-denda (Donostia); Geltoki gozotegia (Donostia); Oiartzun Gozotegia (Donostia); BakerBoyz artisau-gozotegia (Donostia); Leonidas Belgikako txokolatea eta bonboiak (Donostia) eta Maizzami–artisau-tiramisua (Donostia); eta La Gesalina (Andoain).
Azoka arratsaldeko zazpi eta erdiak arte izango da zabalik.
Azokaren egitaraua
- 16:00. Karpa nagusian, Txokolategilea tailerra haurrentzat Maitiana bonboi dendaren eskutik.
- 16:30. OnEin Kontserbak karpan, Mermelada eta txokolatearen tailer esperimentala haurrentzako tailerra OnEin Kontserbak-en eskutik.
- 16:30. Zitueneren karpan, Txokolatearekin jateko pasta frijitua tailerra helduentzat, Zitueneren eskutik.
- 17:15. Karpa nagusian, Oloarekin egindako askari osasungarria familientzako tailerra Dulces Free-ren eskutik.
- 18:00. Gurutze Santuaren plazan, herri txokolate jatea, parte hartze jarduera, eta bukaera ekitaldia Auzoaren Arimaren txokolatezko skyline-a egiten.
