Lezoko Etxebizitza bulegoa ostegunero zabalik
Etxebizitzaren gaineko zalantzak argitzeko, diru laguntzen eta halakoen berri izateko, eta kudeaketa lan nahiz izapideetan laguntza emateko bulego ibiltaria aurkeztu dute.
Mikel Arruti alkatea eta Aitziber Zinkunegi etxebizitza teknikaria, zerbitzuaren aurkezpenean.Lezoko Udala Ostegunero Etxebizitza Bulegoa izango du Lezok. Etxebizitzaren gaineko zalantzak argitzeko, diru laguntzen eta halakoen berri izateko, eta kudeaketa lan nahiz izapideetan laguntza emateko bulego ibiltaria asteko laugarren egunetan izango da herrian, udaletxean zehazki. Izan ere, Oarsoaldeko zerbitzu ibiltaria da Etxebizitza Bulegoarena; Oiartzunen, Pasaian eta Errenteria-Oreretan beste astegun batzuetan izango da.
Udalak adierazi du gertuko arretaren alde egin duela bulegoaren egitasmo ibiltaria babestuz, doakoa da gainera. Alta, etxebizitzaren arloko informazioa, orientazioa edo bestelako zerbitzuak behar dituztenek aurrez txanda hartu behar dute, 943 34 41 60 telefono zenbakira deituta edo bulegoaren posta elektroniko helbidera idatzita. Etxebizitza bat bilatzen ari direnentzat, zein horien jabe eta maizterrentzat dago bideratua zerbitzua.
Zehazki, hauek dira Etxebizitza Bulegoak eskaintzen dituen zerbitzuak:
- Etxebizitza eskuratzea: Etxebide, Alokabide, babes publikoko etxebizitzak eta udal-etxebizitza tasatuak.
- Alokairua: alokairu publiko eta pribatuko aukerak, eta etxebizitza hutsak alokairu merkatura bideratzeko Bizigune eta ASAP programak.
- Gazteen emantzipazioa: Gaztelagun eta Emantzipa programak.
- Diru laguntzak: etxebizitzak birgaitzeko eta irisgarritasuna hobetzeko laguntzak, besteak beste.
- Araudia eta izapideak: etxebizitzarekin lotutako tramiteak, erabilera turistikoko etxebizitzen araudia eta bizitegi merkatu tentsionatuko eremuei lotutako neurriak.
