Elegante dira, eta elegante joango dira
Piztu Lezok Zubitxo Korkoi festa antolatu du larunbaterako. Dozenaka gazte elegante afaltzera joango dira, aurretik herria girotu ondoren.
Aurreko Zubitxo Korkoiren ekitaldi bateko talde argazkia.Piztu Lezo Lan elegante eta handia egiten du urtean zehar Piztu Lezok, izan herriko festetan, edo antolatzen dituen jarduera eta ekitaldien bidez. Orain, elegantzia hori itxurara ere eramatea tokatzen zaie: Zubitxo Korkoi festa egingo dute larunbatean (hilaren 24an). Gazteek etxean dituzten soineko luze eta jakak jantzi, eta kalera aterako dira beste behin herria girotzera, lezoartasunetik, elkarlanetik eta euskaratik.
19:00etan ekingo diote Zubitxo Korkoi egunari gazteek, Tiñelutik hasiko den karro-poteoarekin. Ondoren, 20:00ak aldera, talde argazkia aterako dute Gurutze Santuaren plazan. Segidan Koldobike Gezala pilotalekura joango dira, han baitute afari elegantea; afalostean, egokien edo hoberen jantzi direnei sariak emango dizkiete. Nahi duenak gaua luzatzeko aukera izango du. Antolatzaileen oharra: nork bere edalontzia ekar dezala etxetik.
Aitaren batean saldu ziren, igandean, afarirako tiket denak. Izan ere, aurten Zubitxo Korkoiren antolaketan 35 bat gazte izan dira, aurrek urteetan baino gehiago alegia. Antolaketa lan horietan jende berria izan da, gogoz betea.
