Bertsolaritzak espazio berri bat du Pasaian
Pasaiako Udalak, Gipuzkoako Bertsozale Elkartearekin elkarlanean, haur eta nerabeei begirako bertso eskola sortu du. San Pedron osatu da orain arteko talde bakarra.
Pasaiako Udalak, Gipuzkoako Bertsozale Elkartearekin elkarlanean, mugarri izan den proiektu bat abiatu du aurtengo ikasturtean, haur eta nerabeei begirako bertso eskola sortu baitu. Hasierako asmoa zen taldeak Antxon eta San Pedron sortzea, baina momentuz soilik barruti moreko taldea ari da bidea egiten. Une honetan DBH1eko lau ikasle ari dira bertsolaritzari ahotsa ematen San Pedron. Ostiraletan elkartzen dira, 16:00etatik 17:00etara bitartean, Udal Aretoan, eta Andoni Rekondo Izagirre da taldeko irakaslea.
Rekondo Gipuzkoako Bertsozale Elkarteko langilea da. Pasaiako Udaleko Euskara Sailak detektatu zuen hutsune bat zegoela Pasaian eskolaz kanpo bertsolaritza lantzeko, eta interesa zuten egoera horri buelta eman eta udalerrian bertsolaritza sustatzeko. Rekondok adierazi du Pasaia-Lezo Lizeoan edota Karmengo Aman bertsolaritza lantzen dela, baina herri mailan hutsune bat zegoela. Hori dela eta, Euskara Saila Gipuzkoako Bertsozale Elkartearekin harremanetan jarri zen Pasaian bertso eskola bat sortzeko.
Rekondok nabarmendu du bertso eskolak «oso eragile potenteak» direla herri askotan, euskararen bueltan, udalerrietako kulturan eta bizitza sozialean eragiten baitute. Sustatzaileen helburua ez da soilik herritarrak bertsotan trebatzea, baizik eta Pasaiari ekarpena egingo dion eragile bat sortzea, herri mailan funtzionatuko duena. Orain San Pedroko taldea da funtzionamenduan dagoen bakarra, Antxon ez zuelako jende nahikoak izena eman taldea sortzeko, baina bertso eskola Pasaia osora hedatzen bada, Rekondo ziur da egitasmo garrantzitsua izango dela euskalgintzako eragileak saretzeko.
Ahozkotasunari garrantzia
Pasaiakoa haur eta nerabeei begirako bertso eskola bat da, zehazki LH4tik gorako ikasleei zuzendutakoa, DBHko ikasleak barne. Bertso eskolako kideak astean behin elkartzen dira, eta ordubeteko saioak egiten dituzte. Aurrez aipatu bezala, San Pedroko eskolak ostiraletan dira, 16:00etatik 17:00etara bitartean, udal aretoan.
Saioetan ahozkotasunari «garrantzi handia» ematen diotela jakinarazi du Rekondok. Irakaslearen arabera, bertso eskola «aukera paregabea» da euskararekin jolasteko, buruari eragiteko, sormena bultzatzeko eta talde lanean aritzeko. Aldi berean, aldagai horiek guztiek hizkuntzaren gaineko jakintza eta ezagutza ematen dutela baietsi du Rekondok. Gelan mailaren araberako ariketak egiten dituztela aurreratu du irakasleak: bertso sorta ezagunak kantatzen dituzte doinuak ikasteko, errimak lantzeko ariketa espezifikoak egiten dituzte eta bat-batekotasuna lantzen dute, bat-batean aritzeari beldurra galtzeko.
Bertso eskolako jarduerak, baina, ez dira asteroko saioetara mugatzen, ikasturtean zehar egunerokotasunetik kanpoko jarduerak egiten baitituzte. «Hau Pasaiako bertso eskola da, baina ez da perretxiko isolatu bat, sare zabalago baten parte da. Gipuzkoako bertso eskolak Gipuzkoako Bertsozale Elkartean antolatzen gara, eta urteko kronograma bat dugu bertan», adierazi du Rekondok. Bide horretan, ikasturtean zehar haur mailako txapelketak, topaketak edota egun pasak egiten dituzte. DBHkoen kasuan asteburu pasak ere egiten dituzte. Topaketa horietan Gipuzkoako beste hainbat gazterekin konpartitzen dute bertsoarekiko zaletasuna.
Ikasturtea martxan badago ere, izen emateak irekita daude, eta herritarrak bertso eskolarekin bat egitera animatu ditu Rekondok. Bertsolaritzak espazio berri bat du Pasaian.
