Jon Galfarsoro izango da EH Bilduren alkategaia
Aizpea Otaegiren postua jasoko du Galfasorok, eta maiatzaren 27an alkate izateko borrokan izango da.
Aurreko astean iragarri zuen egungo alkate Aizpea Otaegik ez zuela alkategai moduan jarraituko, EH Bilduk beste aurpegi bat izango zuela 2027ko udal hauteskundeetan. Ba orain, Errenteria-Oreretako EH Bilduko Mahai Politikoak hartu du erabakia, eta Jon Galfarsoro izango da alkategaia, berriro ere udal gobernua lideratzeko saiakera egingo duena. Atzo egin zuten aukeraketa, eta atzo bertan ere, Otaegik, aurpegi aldaketa irudikatzen, zumea entregatu zion Galfarsorori.
Oreretarra jaiotzez eta izatez, zapategi bat izan zuen urte askoz Galfasorok herrian, Musika Plazaren alboan. Baina ez zen bertan geratu, zuzenbidea ikasi baitzuen, eta zapategitik Donostiako ESIra mugitu zen, zehazki Onkologikora, Onkologikoko Batzordeko idazkari gisa. EH Bilduk adierazi duenez, idazkari gisa, Onkologikoa Osakidetzara integratzeko prozesuan, langileen ordezkaritzaren ardura iritsi zitzaion Galfarsorori.
Bere lan profesionalarekin batera, herri mugimendua beti izan du gertu, eta ezker abertzaleko koalizioak adierazi duenez, Topoaren integrazioaren aldeko herri plataformetan izan da urte luzez. “Hain esparru ezberdinetan lan egin eta jardun izanak, alde batetik; eta osasungintza publikoan zein beste alor batzuetan konprometitu izanak, bestetik, pertsona oso egoki bihurtzen dute Jon Galfarsoro EH Bilduren partetik alkate izateko, eta indarberriturik, egindako bideari jarraipena emateko”, azaldu du EH Bilduk ohar bidez.
16 urte geroago
Erronka ez da erraza izango, lau legealdi daramatza eta EH Bilduk Errenteriako Udalean. 2011n, Julen Mendoza izan zen alkatea ezker abertzaleko koalizioaren izenean, eta zortzi urte egin zituen bertan. Ondoren, Otaegi jarri zen buru, eta beste zortzi urte egin ditu. Lehenagotik PSE-EEk 28 urtez lideratu zuen udala.
