'Txipietara' argazkiak emango dio ongietorria 2027ari
Udalak eta Laurak Batek udal egutegiko azala aukeratzeko argazki lehiaketa antolatu dute bigarrenez. Aurten Angela Losa sanpedrotarraren 'Txipietara' argazkia izan da irabazlea.
Pasaiako Udalak eta Laurak Bat Merkataritza, Ostalaritza eta Zerbitzuen elkarteak Pasaiako udal egutegiko azala aukeratzeko argazki lehiaketa antolatu dute aurten bigarrenez. Irailean jarri zen martxan egitasmoa, eta epaimahaiak Angela Losa Mendioroz sanpedrotarraren Txipietara argazkia aukeratu du 2027ko udal egutegiko azala izateko.
Laurak Bateko zuzendaritza batzordeko kideek eta udal teknikariek osatu dute epaimahaia, eta argazki irabazleak Pasaiarekin eta tokiko merkataritzarekin duen lotura nabarmendu dute.
Mikel Garcia Peñil Merkataritza zinegotziak eta Ana Etxabe Laurak Bateko lehendakariak 500 euroko balioa duten erosketa bonuak eman dizkiote irabazleari, elkarteko establezimenduetan gastatzeko. Etxabe pozik da lehiaketak izan duen harreragatik: “Oso pozik gaude lehiaketak izan duen erantzunarekin: iaz baino argazki gehiago jaso ditugu, eta kalitate handikoak. Txipietara argazkiak bikain islatzen du Pasaiaren eta merkataritzaren arteko harremana; izan ere, gurea arrantzale herria izan da beti”.
Bestalde Garcia Peñilek gainerako parte hartzaileen maila nabarmendu du: “Kalitate handiko lanak jaso ditugu aurten. Hori dela eta, Aitzol Garcia Etxarri sanpedrotarraren Lau argi, itsaso bat argazkiak ere bere lekua izango du egutegian”. Udal hautetsiaren arabera, mota honetako egitasmoak “modu bikaina” dira herritarren parte hartzea bultzatzeko, argazkilaritzaren bidezko sorkuntza sustatzeko eta sariari esker tokiko merkataritza sustatzen jarraitzeko.
Argazkiaren istorioa
Angela Losa argazkiaren egileak adierazi du une berezi batean atera zuela argazkia: “Istorio berezia du argazki horrek. Xabier nire bikotekidearekin txipiroiak arrantzatzera atera nintzen txalupa batean, eta argazkian ikusten diren eskuak harenak dira. Argazkilari profesionala naiz, eta ilusio handia egin dit sari hau irabazteak”.
Saria zertan gastatuko duen argi du sanpedrotarrak: “500 euroak hainbat establezimendutan gastatuko ditut. Xabierri arrantzarako materiala erosi nahi diot; gure alabari jostailuak; eta niretzat, arropa. Era berean, Laurak Bateko kide diren tabernetan pintxo batzuk jango ditugu”.
Egutegia HAZ bulegoetan
Azala aukeratuta, udala 2027ko udal egutegiaren prestaketa bukatzen ari dela aurreratu du Garcia Peñilek: “Hirugarren urtez jarraian argitaratuko dugu udal egutegia, eta dagoeneko azken ukituak ematen ari gara. Urte bukaeran, pasaitar guztiek doan eskuratu ahal izango dute HAZ bulegoetan. Data zehatzak aurrerago iragarriko ditugu”.
