Mendiko zinemaren onena esku-eskura
Errenteriako Udalak Urdaburu Mendizale elkartearekin batera Bilbao Mendi Film Festival jaialdian saritutakoak ekarriko ditu udalerrira.
'Izarren Zaunka' filmaren irudi bat Mendiko zinemaren onena ikusteko parada izango da Errenteria-Oreretako Niessen zinemetan ostiralean —azaroak 6—. Bilbao Mendi Film Festival jaialdian iaz saritu zituzten hainbat lan ekarriko dituzte udalerrira udalak eta Urdaburu Mendizale elkarteak.
Denera hiru lan emango dituzte 19:00etan hasiko den emanaldian. Nagore Ezeiza Mujikak zuzendutako Izarren Zaunka Eitb Euskarazko Film Onena BBK Mendi Film Bilbao-Bizkaia 2025 sariaren irabazlea izango da lehena. Mikel Saiz de Ubarainek Txindokin zabaldu duen bidea eskalatzeko asmoz Larraitzen daude bi lagun. Saez de Uribainek inspirazioa aurkitu nahi du bide berriari izena jartzeko tokiko bake eta lasaitasunean. Iker Urangak, berriz, bere min kronikoetatik eta antsietatetik askatzea lortu nahi du. Filmak 18 minutuko iraupena du.
Julen Elorzak zuzendutako Cantos y flores filmak hartuko du lekukoa; Kirol eta Abentura Film Onena izan zen berea iazko jaialdian. Anaia hil eta zazpi urtera, harekin egin asmo zuen ametsari eutsiko dio Karina Corsoliok: Boliviako Huayna Potosi, Illimani eta Sajama mendi ikonikoak igo eta jaistea ahalik eta lasterren FKTak ezagutzen den denbora azkarrena ezartzen saiatuz. Bidaide izango du Hillary Gerardi mendi korrikalari zaildua. Erronkarekin batera mina kanporatuko du Carsoliok, zauriak ixteko aukera aurkituko du, eta espiritualki bere buruarekin eta naturarekin bat egingo du. 27 minutuko iraupena du filmak.
Emango duten azkena, Trango, Leo Hoorn zuzendariaren filma. Bi urtez saiatu ondoren Christina Lustenberger eta Jim Morrison mendi eskiatzaileak, Nick McNutt eta Chantel Astorgarekin batera, Trango Glaziar Handiaren lehen eski jaitsiera egin zuten. Arriskuak, oinazea, eta muturreko erronka fisikoa, giza esperientziaren mugak desafiatzeraino. 6.000 metrora, etengabeko esposizioak eta determinazioak talka egiten dutenean, espedizio taldearen konfiantza eta laguntza irmoa dira elkarrekin aurrera egiteko gakoa. 45 minutuko iraupena du filmak.
Horiek ikusteko sarrerak 4 euroan eros daitezke online (klik hemen), Lekuona Fabrikan, Aldakoenea udal Bibliotekan, eta emanaldia hasi baino ordubete lehenago Niessen zinemetako leihatilan.
