Lezoko baratze parkeko 58 partzelak esleipenera aterako dira
Abenduaren 31n bukatuko dira egungo erabilera lizentziak, eta horiek berritzeko prozesua abiatu du udalak.
Lezoko baratze parkearen irudi orokorra.Lezoko Udala Lezoko Udalak azaldu du San Pedro auzoko eremuan den baratze parkeko 58 partzelak esleipenera aterako dituela. Hilaren 11tik 20ra izango dute hala nahi dutenek parkeko partzela bat eskatzeko aukera Dena dela, prozesuaren gaineko informazioa emateko batzara antolatu du udalak hilaren 11rako (asteazkena da) 18:30ean Kultura Aretoan. Saio horretan prozesu berriaren xehetasunak azaltzeaz gain, parkeari lotutako beste gai batzuk ere jorratuko dira, eta erabiltzaileen ekarpenak eta proposamenak jasotzeko aukera izango da. Esleipen prozesuaren gaineko xehetasunak udalaren webgunean ikus daitezke.
Azalpen sinplea du parkeko partzelak esleipenera atera izanak: indarrean diren erabilera lizentziak abenduaren 31n bukatuko dira. Hala, prozesuan lur saila lortzen dutenek horiek sei urtean erabiltzeko aukera izango dute, hau da, 2027ko urtarrilaren 1etik 2032ko abenduaren 31ra arte. Prozesuan egun partzela dutenek eta ez dutenek parte har dezakete. “Baratze parkea baratzeen erabiltzaile eta herritar ororen topagunea da, izan ere, herriari irekia dagoen eremua da eta giza talde ezberdinen arteko elkarbizitza eta harremanak sustatzen dira bertan”, esan du udalak.
Esleipen prozesuan parte hartzeko baldintzen artean dago, eskatzaileek gutxienez duela hiru urtetik Lezon egon behar dutela erroldatuta. Nola ez, eskariak egiteko bete beharreko dokumentazio guztia ere aurkeztu behar da. Nork bere barazkiak era ekologikoan landatzen eta aisialdi aktiboaz gozatzeko aukera ematen du parkeak.
Eskaera horiek HAZ bulegoan aurrez aurre, edo udalaren egoitza elektronikoaren bidez helarazi behar zaizkio udalari.
