77,5 milioi euroko aurrekontua herria egiten jarraitzeko
Aurrekontu igoerarik handienak, kirola; trafikoa, garraioa, herritarren segurtasuna eta herritarren babesa; garapen ekonomikoa; eta hezkuntza eta gazteria arloetan proposatu ditu gobernu taldeak.
Aizpea Otaegi, Maite Gartzia eta Eneko del Amo aurrekontua aurkezteko agerraldian. 77.650.120 euroko aurrekontua izango du Errenteriako Udalak 2027an. Gaur aurkeztu du Aizpea Otaegi alkateak, Eneko del Amo Ogasuneko zinegotziak eta Maite Gartzia alkateordeak. Aurtengoa baino %6.47 handiagoa da datorren urterako proposatu duten aurrekontua 2019. urtekoarekin alderatuta, 23,5 milioi euro gehiago dira, eta igoerarik handienak kirola(%50); trafikoa, garraioa, herritarren segurtasuna eta herritarren babesa (%35 ; garapen ekonomikoa (%24); eta hezkuntza eta gazteria (%19) arloetan egin ditu.
Orain arte bezala, datorren urteko aurrekontuak goranzko joerari eutsiko diola hortaz, jarri du nabarmen Otaegik, eta horren ararzoia ere azaldu du, “udalaren finantzaketa gaitasun handiagoaren emaitza da, Udal Finantzaketarako Foru funtsaren ekarpenarekin batera diru sarrera berrien aurreikuspenaren ondorioa dena”. Aurrekontu horri esker, agintaldirako aurreikusitako proiektuak garatzen jarraitu ahalko duela udalak, eta udalerri kohesionatu baten alde lanean jarri du nabarmen udal agintariak, “kalitatezko zerbitzu publikoak, pertsona guztientzako aukerak eta eguneroko bizitza hobetzen lagunduko duten ekipamendu publikoak eta hiri espazioak dituen herri baten alde”.
Inbertsio berriak jasotzen ditu 2027ko aurrekontuak, eta aurreko ekitaldietan hasitako proiektuei segida emango die. Jarduketa nagusietako batzuk aipatu ditu Otaegik agerraldian. Hala, Barandiaran parkeko lanak bukatzeko, azkeneko partida parkea errealitate bihurtzeko 750.000 euroko diru zatia, “horrekin bukatuko dira parkea eraikitzeko lanak, eta herriak espazio berde garrantzitsua eta elkargune garrantzitsua lortuko du. Gure hiri parkeen sarea nabarmen hobetuko da, eta gainera, zor historiko bat kitatuko dugu Pontika auzoarekin”. Doinuola, Altzaten eraikiko duten kultur ekipamendu berria sustatzeko 2 milioi euroko inbertsioa aurreikusi du gobernu taldeak 2027ko aurrekontuetan, “datozen asteetan hasiko dituzte lanak Altzaten”. Inbertsio garrantzitsua, halaber, Pontika eta Igantziko igogailu berriaren bigarren faseari ekiteko; 1,3 milioi euroko aurrekontua bi auzoen arteko lotura osatu eta irisgarritasuna hobetzeko.
Kirol instalazioetan ere inbertsio handia, 400.000 eurokoa, Kaputxinoetako igerilekuen urte osoko instalazioak, Fanderiako instalazioen hobekuntza eta Gamongoako erabilera anitzeko kirol ekipamendu estali berria sartu dituzte atal horretan. Ondartxoko hiltegia eraberritzeko martxan den esku hartzea bukatu eta eraikina kirol eta komunitate ekipamendu bihurtzeko, 800.000 euroko diru sarrera aurreikusi du aurrekontuak. Altzateko aparkalekua ere inbertsioen atalean; 130.000 euro bideratuko dira aparkaleku berri bat eraikitzeko proiektua idaztera. Beraun kale hasieran dagoen aparkalekuaren antzekoa eraikiko dute bertan, orain probisionalki egindako aparkalekuan.
Auzoak Hobetu
Auzoak berroneratzeko jarduketek ere lekua dute aurrekontuan, hala azaldu du Otaegik. Arlo horretan, Galtzaraborda planari egin dio aipamena, “500.000 euro bideratuko dira Mandoegi kalea urbanizatzera. Urdaburu parkearen urbanizazio proiektua idazteko, berriz, 150.000 euro aurreikusi dira”. Jarduketa horiek Europako funtsen laguntza dute.
Tokiko ekonomia sustatzea “funtsezkoa” jo du alkateak “enpleguari, auzoetako jarduerari eta udalerriaren bizitasunari eusteko. Aurreikusitako jarduketen artetik bi aipatu ditu, tokiko merkataritzari laguntzea (150.000 euro) eta enplegua eta eskualde garapen plana garatzea (837.000 euro). Ongizatea, kultura eta gizarte kohesioarekin lotuta datorren urteko aurrekontuek ongizate kolektiboari laguntzen dioten hainbat politika mantendu eta indartzen dituela nabarmendu du. Hala, gizarte zerbitzuetako aurrekontua %2,12 handituko da; kultura arlokoa %5,69 handituko da, eta aniztasuna arlokoa ∞2,21.
Esku artean dute dagoeneko aurrekontu proposamena gainerako talde politikoek, “azaroaren 2an saioa egin genuen aurkezteko eta orain egin ditzaketen ekarpenen zain gara”. Adostasunetara heldu nahiko luketela zehaztu du Otaegik halako gai garrantzitsuan, “helburua elkarrizketa sustatzea eta topaguneak bilatzea da aurrekontua aberastu eta errenteriarren behar eta proiektuen gaineko ahalik eta adostasun handiena lortzeko”.
Abenduaren 2an izango da aurrekontuak onartzeko udalbatzaren bilkura.
