San Pedroko hilerriko horma berrituko dute
Horma erortzeko arriskuan dago eta udalak obrak hasiko ditu astelehenean. Alkateordetzaren atzeko bidearen zati bat itxiko dute, oinezkoen segurtasuna bermatzeko.
Pasaiako Udalak San Pedroko hilerriko hezurtegiko horma bat berritzeko lanak hasiko ditu, erortzeko arriskua antzeman ondoren. Horma okertzen ari da, eta hura osatzen duten elementuak alkateordetzaren atzeko bidera eror daitezkeela ikusi du udalak.
Oinezkoen segurtasuna bermatzeko, atzo hesiak eta ohartarazpen kartelak jarri zituzten, bidearen zati bat ixteko. Itxitura hori lanak bukatu arte mantenduko dute. Udalak adierazi du afekzioa txikia izango dela, eta eragin txikia izango duela oinezkoen joan-etorrietan, beste bide batzuk erabil baitaitezke itxitako zatitik pasa gabe.
Udaleko Zerbitzu sailak, igeltsero eta hilerriko langileekin batera, inguruko sasiak garbitu ditu eta hormari behin-behinean eusteko elementuak jarri ditu.
Lanak astelehenean (hilaren 9an) hastea aurreikusi du udalak. Aldamioa muntatu ondoren, egungo horma kendu eta berria eraikiko da. Eguraldiak ahalbidetzen badu, obrak bi aste barru bukatzea aurreikusi du udal erakundeak. Jarduketek 11.797, 50 euroko kostua izango dute, BEZa barne.
