Itxita esnatu da Errenteria-Orereta
Jarraipen zabala izaten ari da greba orokorra, pertsiana ia guztiak jaitsita. Tentsio uneak izan dira Ertzaintzaren eta grebaren informazioa zabaltzen ari zen taldearen artean, eta hainbat lagun identifikatu ditu poliziak.
Itxita esnatu da Errenteria-Orereta, grebaren jarraipen zabalarekin. Itxita. Horrela esnatu da Errenteria-Orereta. Datuen faltan, bihar emango dituzte sindikatu deitzaileek, arrakastatsua izaten ari dela gaurko egindako greba deialdia udalerrian ziurta daiteke. Goizean goiz hasi dira piketeak informazio lanak egiten, eta Oarsoaldekoei dagokienean poliziaren jazarpen itogarria izan dutela lehen ordutik azaldu dute protestaren deitzaileek.
Auto karabanan parte hartu duten pertsonak identifikatu ditu Ertzaintzak, hala azaldu dute grebaren deitzaileek, eta goizaldean dagoeneko gutxienez zortzi lagun identifikatiui dituztela jakinarazi dute. Autokarabanan parte hartzen ari ziren grebalariak Gaintxurizketako, Pasaiako eta Lartzabalgo biribilgunetan gelditu eta identifikatu dituzte.
Halaber, gutxienez, beste hiru lagun identifikatu ditu Ertzaintzak Oliden kanpinaren parean; autoa geldiarazi eta identifikatzeaz gain miatu egin dituztela salatu dute grebalariek.
09:00etan elkartu dira informazioa piketeak Errenteria-Oreretako Herriko Plazan. Aurretik aritu dira Etxebizitza Sindikatu sozialistako piketeak informazio lanak egiten Oarsoaldean barrena ere; haiek ere salatu dute Ertzaintzaren jazarpen itogarria lehen ordutik, “identifikazioak egiten ari dira uneoro”. 10:00etan gelditu dira haiek Niessen merkatalgune parean Donostiako manifestaziora abiatzeko.
Greba batzordeak deitutako informazio piketeetan, talde handia batu da, 100 lagunetik gorakoa eta Erdialdeko kaleetan barrena ibili da talde hori greba eguna dela gaurkoa, eta horren gaineko informazioa zabaltzen. Ertzaintzaren patruilek gertutik jazarri dituzte, eta piketeek bidea lasai egin badute ere, bi tentsio une izan dira gutxienez goizeko tarte horretan. Lehena, Nafarroa hiribidean izan da. Piketeek pankarta zabaldu dute errepidean eta berehala azaldu dira Ertzaintzaren hainbat patruila eta kaskoak jantzita errepidetik erretiratzen hasi dira jendea, bultzaka. “alde hemendik, utzi bakean” eta “gaur, greba orokorra” oihuekin erantzun diete poliziei grebalariek. Hor, gutxienez lagun bat identifikatu dute ertzainek.
Beste tentsio unea Zapirain anaien kalean, Matxaingo Eroski aurrean izan da. Supermerkatua zabalik zen eta informazio piketeak bertaratu eta ate aurrean jarri dira. Ertzaintza bertaratu eta saltoki paretik bultzaka atera ditu. Berriro ere “gaur greba orokorra” oihuekin erantzun dute bildutakoek. Puntu horretan ere, gutxienez pertsona bat identifikatu du Ertzaintzak.
Horietaz aparte, okindegi bat zabalik Biteri Txiki kalean eta Kafetegi bat Santa Klara kalean. Pikete informatiboak entzun dituztenean, biek itxi egin dute.
Hurrengo hitzordua Oarsoaldeko herritarrek Donostian dute; 11:45ean abiatuko da Oarsoaldea eta Bidasoko zutabea Donostiako Renfeko geltoki paretik Pio XII ingurura. Manifestazioarekin bat egingo du bertan.
Arratsaldean deialdia manifestaziorako, aurretik baina, bazkari autogestionatua egingo dute Errenteria-Oreretako Herriko Plazan. Oarsoaldeko manifestazioa puntu beretik abiatuko da 18:00etan; Oiartzunen ere ordu horretan dute deitua protesta. Greba batzordeak herritar guztiak deitu ditu manifestazioarekin bat egitera “etxebizitza eskubidea eta soldata duinak bermatzeko”.
