Jarraipen handia izan du greba orokorrak Pasaian
Donibanen, San Pedron eta Antxon herriguneetako establezimendu gehienak itxi egin dituzte. Trintxerpen gorabeheratsua izan da jarraipena.
Etxebizitza eskubidearen aldeko eta espekulatzaileen kontrako gaurko greba orokor deialdiak jarraipen handia izan du Pasaian. Donibaneko, San Pedroko eta Antxoko herriguneetako establezimendu gehien-gehienek erabaki dute gaur aterik ez zutela zabalduko, grebarekin bat eginez. Trintxerpeko argazki orokora bestelakoa izan da, izan direlako jarduna izan duten negozioak.
Aurretik egindako lanketak eragina izan du, oro har Pasaian. Hala demostratzen du grebaren eragin zabalak. HITZAk barruti guztietako herritarrekin hitz egin du, eta haiek esandakoaren arabera jarraipen zabalekoa izan da gaurko deialdia. Pasaia-Lezo Lizeoko langileek erabat bat egin dute grebarekin, eta Trintxerpeko Karmengo Amako langileen artean %60 ingurukoa izan da jarraipena.
Pasaitarrek 07:00etan Lezotik abiatu den auto-karabanarekin bat egin dute lehenik. Ondoren, barrutietan informazioa emateko piketeetan izan dira. Jarraian, Donostiako manifestaziora joan dira, Oarso Bidasoko zutabearen parte izatera.
Pasaiako grebalariek deia egin dute arratsaldean (18:00) Errenteria-Oreretan egitekoa den eskualdeko manifestazioarekin bat egiteko.
