Herri Arte Eskolako musikarien kontzertu zikloa Lekuonan, eta erretiratuen klubetan
Zortzi emanaldi egingo dituzte denera, formatu handiko bat Lekuona Fabrikan, eta txikiagoak baina kalitate berarekin herriko erretiratuen klubetan
Udazkena musikatuko du Herri Arte Eskolak. Izan ere, bertako musikariek kontzertu zikloa antolatu dute; zortzi emanaldi denera, formatu handiko bat Lekuona Fabrikan, eta txikiagoak baina kalitate berarekin herriko erretiratuen klubetan. Gaur aurkeztu dute kontzertu ziklo hori Iñaki Queralt, Herri Arte Eskolaren lehendakariak; Naroa Zabala, Gizarte Zerbitzuetako zinegotziak; Beñat Ralla, Herri Arte Eskolako koordinatzaile pedagogikoak; eta jubilatu elkarteetako ordezkariek.
Hilaren 19an hasi eta 24 arte egingo dute zikloa, eta denera zortzi emanaldi eskainiko dituzte. Lehena, formatu handiko Lekuona Fabrikakoa; hilaren 19an izango da—osteguna— 19:00etan. Orkestra, Banda eta Atlantikaldiaren talde handien parte hartzearekin. Kontzertua, askotarikoa, gainera dantza ikasleen emanaldiarekin aberastuko dutena. Doakoa izango da emanaldi hori, eta parte hartzeko gonbidapenak Herri Arte Eskolaren arreta bulegoan eskuratu behar dira.
Hilaren 20, 23 eta 24an erretiratuen elkarteen txanda helduko da; instrumentu guztietako bakarlari eta talde txikiek osatuko dute egitaraua. Hilaren 20an, ostirala Kaputxinoetako San Jose erretiratuen elkartean gitarra eta ahotsa uztartuta ariko dira 1830ean; Galtzarabordako Parkea erretiratuen elkartean berriz, helduen banda eta haize ikasleek egingo dute emanaldia 18:00etan hasita egun berean. Hilaren 20an ere Pontikako Arramendipe elkarteko emanaldia, piano eta haize ikasleekin 18:00etan; Beraungo Bienvenido elkartean, 18:00etan ere, Orkestra txikia, hari eta piano ikasleak; Beti Bizkor Olibeteko erretiratuen elkartean helduen orkestra, piano eta hari ikasleak 18:00etan hasita.
Hilaren 23an trikitrixa eta pandero ikasleak Gabierrotako Laguntasuna elkartera joko dute 18:30ean emanaldia eskaintzera, eta 24an, txalaparta eta alboka taldeak egingo du kontzertua Agustinak Markolako San Agustin elkartean.
Tartean, hilaren 22an, igandea, txistulariek hitzordu bikoitza izango dute: 09:30ean diana egingo dute erdialdeko kaleetan barrena, eta 12:30ean kontzertua udaletxeko arkupetan Indalezio Bizkarrondo Bilintxen heriotzaren 150. urteurrena gogoratzeko. Bere doinu eta poesian oinarrituta, Maria Mendizabal, Mirari Perez, Martin Otazo eta Iñaki Zabaleta abeslarien laguntzarekin eta Andoitz Antzizar gitarristaren laguntzarekin ariko dira kontzertuan txistulariak.
Emanaldi sortarekin Herri Arte Eskolak herriarekiko ikuspegi komunitarioan sakontzen jarraitu nahi duela azaldu du Queraltek, “izan ere, aurreko urteetako harrera eta hartu emana ezin eskergarriagoak izaten ari dira. Ikasleentzat ere jendaurrean aritzeko aukera paregabea da”.
Harago jo du Herri Arte Eskolaren presidenteak, eta emanaldien bidez “belaunaldiarteko esperientzia bikaina” errepikatuko dela, aurten berriro jarri du nabarmen.
Arrakastatsuak zian ziren iazko emanaldiak eta erretiratuen elkartetako ordezkariak ere hala esan dute, “aurten iaz bezain aberasgarria eta ahal bada gehiago, izatea espero dugu”, gaineratu du Queraltek.
Eskolako zuzendari pedagogikoak berriz, ikasleek gustu handiz egiten dituztela emanaldiak esan du, “are gehiago elkarteetan prestatzen dizkizuen askariekin”.
Aurten berriz ere, herriko auzo ezberdinetara eramango dute musika, Herri Arte Eskolako ikasleek, herritar guztien eskura jartzeko.
