Kuxkuxero gehiago Oarsoaldean
Julen Unanue eduki sortzailea eta Mugan musika taldeko kideak Oiartzungo, Lezoko eta Pasaiako 12-18 adin tartekoekin izango dira aurrez aurre zer eta nola egiten duten partekatzeko.
Eskualdeko gazteek eurek gustuko dituzten erreferenteekin hitz egiteko eta zer egiten duten ezagutzeko aukera izango dute beste behin Kuxkuxeroak egitasmoari esker. Hala, Julen Unanue eduki sortzailea eta Mugan musika taldeko kideak Oiartzungo, Lezoko eta Pasaiako 12-18 adin tartekoekin izango dira aurrez aurre zer eta nola egiten duten partekatzeko solasaldi ireki eta atseginekin. Oarsoaldeko Euskara Batzordearen ekimenez gauzatuko dira saioak.
Lehen hitzordua Lezoko Kuadrillategiko kideek izango dute, hilaren 20an; Julen Unanue izango da han. Eduki sortzailea Oarsoaldean izango da berriz ere abenduaren 4an, zehazki Pasaiako Kuadrillategiko kideekin.
Mugan taldekoak Oiartzunera joango dira, hango Gazte Topalekuan izango dira talde donostiarreko musikariak hilaren 27an.
