Gabonetan, euskarazko kultura opari
Euskarazko produktuen katalogo berria plazaratu du Oarsoaldeko Euskara Batzordeak. 0-16 adin tartekoei zuzenduta dago, eta adinaren araberako bi zatitan banatua.
Oarsoaldeko Euskara Batzordeak —eskualdeko lau udalek dute ordezkaritza han— 2026-2027ko Euskarazko Produktuen Katalogo berritua plazaratu du. 0-16 adin tartekoentzat dago antolatua, baina bi zatitan: 0-12 artekoentzat da bat, eta bestea 13-16 tartekoentzat. Musika, informatika,filmak, liburuak, aldizkariak, komikiak, jostailuak, jokoak eta euskarazko webgunean aurki daitezke katalogoaren barruan, baita horien ezaugarriak ere.
Gurasoei haurrei zuzendutako euskarazko produktuak aurkitzea erraztea, eta gazteei beren gustu eta interesekin bat datozen euskarazko proposamenak ezagutzeko aukera ematea da katalogoaren helburua. Horrela, Gabonetan euskarazko opariak egiteko ideia eta proposamen asko izango dituzte gurasoek eta hala nahi dutenek. Oarsoaldeko katalogoa Euskal Herriko beste udal eta mankomunitate batzuekin elkarlanean osatu da.
Oarsoaldeko Euskara Batzordeak adierazi du gero eta herritar gehiago daudela aisia, ikasketak eta bizitza bera euskaraz bizi nahi dutenak. “Euskarazko eskaintza gero eta zabalagoa eta erakargarriagoa da, eta katalogo honek aukera horiek ezagutarazten laguntzen du. Izan ere, hizkuntza ohituretan, aisialdian eta eguneroko bizitzan txertatzeko, garrantzitsua da euskarazko produktuak ezagutzea eta horien aldeko hautua egitea”.
Webguneetan antolatua dago haurren eta gazteen eskaintza. Web atariak moldakorrak direnez, bertan azaltzen diren produktuak etenik gabe berritzen dira. Hala, berritasunak hilero-hilero jaso nahi dituenak katalogoaren buletinera harpidetzeko aukera du.
