Sei hamarkadako ibilbidea musikaz ospatuko du Andra Marik
Santa Zezilia egunaren bueltan bi kontzertu antolatu ditu abesbatza entzutetsuak musikarien zaindariaren omenez, eta bere 60. urteurrena ospatzeko.
Andra Mari abesbatza eta orkestra.Andra Mari Abesbatza Musikarien zaindariaren bueltan bi kontzertu antolatu ditu Andra Mari abesbatzak. Santa Zezilia eguna ospatzea izango da emanaldien aitzakia, baita abesbatzak 60 urteko ibilbidea beteko duela ere. Hilaren 21ean izango da lehen emanaldia, larunbatean 19:00etan. Harmonia Ederrean zikloaren beste hitzordu batekin. Oraingoan saxofoi kontzertua izango da, Alejandro Galindok eskainia, Jose Luis Ansorena bekaren irabazleak. Pianoan Michel Reynoso izango du lagun emanaldian.
Andra Mari Abesbatzaren egoitzan izango da emanaldia (Pablo Iglesias kalea, 11).
Saxofoia Frantziako musikan izenburua izango du kontzertuak eta instrumentu horretarako frantziar errepertorioko obra adierazgarrienetako batzuetan barrena ibilbidea eskainiko du bekaren irabazleak. Hala, Maurice Ravel, Jacques Lbert, MArcel Bonneau eta Fernande Decruck konpositoreen obrak entzuteko aukera izango dute bertaratzen direnek, “haien lanak Europako saxofoi errepertorioaren erreferente bihurtu ziren”.
Andra Marik nabarmen jarri du emanaldiaren bidez entzuleek Jose Luis Ansorena Bekaren bidez aitortutako gazte baten talentuaz gozatzeko aukera izango dutela, “bekak lotura estua du abesbatzaren sortzailearen ondare musikal eta hezitzailearekin. Gainera berezia izango da, urteurrenaren barruan kokatzen delako emanaldia, erakundeak sei hamarkada bete baititu musika eta kultura jardunean”.
Bigarren hitzordua, asteburuan bertan, igandean (hilaren 22an). Santa Zeziliako kontzertua ondu du horretarako abesbatzak Fatimako Andra Mariaren elizan, 18:30ean. 60 urte Mozarten eskutik goiburupean, egile hori izango da protagonista. Andra Mari Abesbatza & Orkestra ariko dira monografiko horretan, eta programazioa Koroatze Meza, Kv317 ospetsuaren inguruan egituratuko dute, Mozarten erlijio konposizio ezagunenetako bat. Do maiorreko Kirchnsonata, sopranoarentzat idatzitako Laudate Dominun salmoa eta Ave Verum corpus motete ezaguna ere interpretatuko dituzte emanaldian.
Andoni Sierrak zuzenduta, ahots laukotea izango du lagun Andra Marik: Haizea Lorenzo sopranoa, Maria Izaga altoa, Aitor Garitano tenorra, eta Jesus Garcia Arejula baxua.
Kontzerturako sarrera 10 euroan dago salgai eta online, Lekuona Fabrikan zein Aldakoneko udal bibliotekan eros daitezke; kontzertuaren egunean bertan elizaren sarrera nagusian ere salgai izango dira, 17:30etik aurrera.
Andra Mari Abesbatza 1966an sortu zuen Jose Luis Ansorenak, eta bidean zehar musika eta kultur ekarpen itzela egin dio Errenteria-Oreretari. Ansorena 2019ko maiatzean hil zen; Andra Marik haren omenez sortu zuen Jose Luis Ansorena Beka, eta aurtengoa seigarren ekitaldia izan du.
