Gutuna: "Ez gara inoiz bakarrik sentitu, mila esker bihotzez"
Jaizkibelen hilda aurkitu zuten mendizalearen seme-alabetako batek gutuna helarazi dio HITZAri familiaren izenean. Modu batera edo bestera, errenteriarra bilatzeko lanetan edota familiari laguntza eta babesa ematen aritu diren guztiei esker ona adierazi die. Ondoren hitzez hitz, hark esandakoak:
Nola eskertu. Nola eskertu inguruko familia, lagun eta lankideei. Nola eskertu modu batera edo bestera egun hauetan zehar laguntza eta babesa ematen aritu zareten guztioi. Nola eskertu egunero koordinatzaile bezala lanean aritu zaretenoi. Egunero bilaketan zeuden guztiei babesa eman eta indarrak berreskuratzeko baliabideak ematen aritu zareten DYAko eta Gurutze Gorriko boluntario eta teknikoei. Baita erreskate taldeko profesional guztiei, erakutsitako kemenagatik.Goizeko lehen ordutatik eguneko azken ordutaraino bilaketa lanetan aritu zareten boluntario guztiei.Ezin dugu hitzez azaldu familian sentitu dugun babes, indar, animo eta harrotasuna. Ez gara inoiz bakarrik sentitu, mila esker bihotzez.Mattin Solis Uitzi, Solis Uitzi familiaren izenean
