Gutuna: 'Badiaren biziberritzea Antxorentzat'
ADIFek Pasai Antxoko tren geltokia berritu behar duela iragarri du; iritzi artikulu honetan geltokia berritzeko planteamendu bat proposatzen da, eta tokiko erakundeei horren alde egin dezaten eskatzen zaio, ADIFekin negoziatuz.
Pasai Antxoko tren geltokia
Hilabete bat baino gehiago da ADIFek sorpresaz hartu gintuela, Antxon geltoki berri bat eraikitzeko asmoa duela iragarriz. Geltokiaren lurrek Antxo Iparraldea zokoratu eta baldintzatzen dute, ganorazko autobus geltoki baterako ere nahikoa tokirik utzi gabe.
Antxoko geltokiak erabiltzen ez diren trenbideak ditu, eta oso gutxi erabiltzen den eraikin bat bidaia txartelen salerosketarako. Horiez gain, sei trenbideetako parke bat du aparkalekurako, aspalditik oso gutxi erabiltzen dena. Tren bat edo bi egon ohi dira aparkatuta, eta askotan bat bera ere ez, beraz, bistan da ez dela oso beharrezkoa, are gehiago kontuan izanik Lezo-Gaintxurizketako geltoki intermodalean aparkalekurako trenbideak egongo direla.
Oso komenigarria litzateke gure erakundeek (udala, aldundia eta Eusko Jaurlaritza) urrezko aukera hau baliatzea eta aipatu lanak badiaren biziberritzearen parte bailiran kontuan hartzea (izan ere, Antxori, biziberritze horren barruko ezer ez baitzaio egokitzen ari) eta ADIFekin negoziatzea, geltokia berritzeko proiektua aparkaleku eremurantz mugituz. Hau da, bazter trenbideak eta txarteldegia hartzen duen eraikina kendu, eta trenbide nagusiak aparkalekurantz mugitu. Modu horretan Pasaia-Irun norabidean doan trenbidea Pasaia-Donostia trenbidea bihurtuko litzateke (gaur egun jada Donostiarantz trenak irteten dira) eta geltokia bera eta nasa eta aparkalekurako 1 eta 2 trenbideak, trenbide nagusi bihurtuko lirateke; Horiez gain, gaur egun aparkaleku gisa erabiltzen den 3. trenbidea Pasaia-Irun arteko nasarako litzateke. Hau guztia eginda ere, aparkalekurako hiru trenbide geratuko lirateke soberan.
Proiektuaren aldaketa honekin Antxo Iparrak espazio ezin ederrago bat irabaziko luke, etorkizunerako proiektuei ateak irekiz, errepidea etxeetatik aldentzea kasu, eta pasealeku edo bulebar bat eraikitzeko aukera sortuz (bere garaian agindu ziguten moduan, baina gaur gaurkoz ez daukaguna), edota ganorazko autobus geltoki bat eduki, (eta ez gaur egun daukaguna), aparkatzeko toki hain eskasak eta beharrezkoak sortu, eta bestelako hamaika hobekuntza ahalbidetu.
Irunen ADIFekin negoziatzea lortu dute trenbideak lurperatzeko; Antxorako planteamendu honetan ez da hainbeste eskatzen. Tren geltoki berri bat toki berean eraikiko balitz Antxo Iparra zokoratuta eta kondenatuta geratuko litzateke, espaziorik gabe, hamarkada askotarako, eta hori gertatzea, gaur egun, oso tamalgarria litzateke.
