Gutuna: "Negazionismoa Oreretako Udalean"
2021eko otsailean Altzateko eremuan egin nahi den proiektuari buruz alegazio batzuk jarri ziren, besteak beste, klima aldaketarekin zerikusia duen bat. Alegazio horren arabera, klima aldaketak itsas mailan igoera handia ekarriko du. Horretaz gain, gure eskualdean aurreikusten diren prezipitazioek ere muturrera joko dute, hau da, lehorte handitik eurite handira pasatzeko joera izango da. Horrek guztiak gure herrian eragin handia, uholdeak barnean, izan dezakeela aurreikusten da eta, gure ustez, Altzateko proiektu horrekin egoera larriagotu egingo da.
2022ko azaroan, hots, urte eta erdi beranduago alegazioen erantzuna jaso da, hain zuzen ere, Udalbatzarrak Altzateko proiektuaren behin betiko aldaketa bat onartu ondoren, herritarroi aldaketa honen aurka egiteko tresna administratiboak erabiltzea ukatuz.
Klima aldaketaren alegazioari emandako erantzunen artean gehien harritu gaituena zera izan da: alegazioan aipatzen zen ikerketa bati buruz (mapa eta guzti) udalak dio datu horiek ez dutela zehaztasun handirik eta mapan dauden eta urez bete daitezkeen eremuak itsas mailan daudenak direla. Eta gaineratzen du Altzate itsas mailatik 7 metrora eraikiko denez, ez dagoela kezkatzerik. Bestalde, herritar xeheentzat ulergaitzak diren datu asko ere ematen du. Kasu honetan, aldiz, ikerketa horiek udalarentzat zehatzak dira, nahiz eta datu horiek ere aurreikuspenak izan.
Hala ere, erantzun hau ez dator bat duela egun gutxi Pasaiako badia mehatxupean dagoela dioen albistearekin. Bertan azaltzen zen mapan Altzate, Iztieta eta… urez bete daitezkeela ikusten da. Hain zuzen ere, alegazioan jasotzen zen informazio bera, instituzio askok ontzat ematen dutena, baina Oreretako Udalak balioa ukatzen diona. Aurreikuspenez ari gara hitz egiten, eta errealitatea askoz gordinagoa izaten da, lehen baino kalte gehiago eta larriagoak ari baitira gertatzen, edonoiz ikus dezakegun bezala.
Tamalgarria da udalak bere horretan segitzea; izan ere, proiektu urbanistikoekin esperientzia txar hori bizi izan dugu, Fanderia eraiki zenean. Auzo hori zegoen itsas mailatik gorago eraiki zen, inguru horretan egoten ziren uholdeak saihestearren. Orain ibaiak gainezka egiten duenean, Lartzabal auzoa urez betetzen da. Oiartzun ibaiak gainezka egitean, urak hartzen zituen eremu naturalak egun urbanizatuak daude, Altzate izan ezik. Altzaten egin nahi duten auzo berria agian ez da urez beteko, baina Iztieta, Ondartxo eta erdialdea izango dira kalte larriak jaso ditzaketenak, eta honek ez al du Udala kezkatzen?
Santi Angulo Martin. Altzate Bizirik.
