Gutuna: "Oroimenaren altzoan"
Joxe Iriarte Bikila-k gutuna bidali du HITZAra, oinarri izanda astelehenean Duintasuna pentsiodunen mugimenduak hari eta hura bezala pentsio duinen aldeko borrokan jarraitzen dutenei egin zitzaien omenaldia. Hona, hitzez hitz, hark esandakoak:
Astelehenean, laurogei urte gora egin dugun eta Oreretako Jubilatuen mugimenduaren hastapenetik jardun dugunoi, omenaldi xume bat egin zitzaigun Herriko Plazan. Hantxe, dantzariek aurreskua dantzatzen zuten bitartean, nire memoriak atzera egin zuen. Herriko Plaza horretan duela berrogeita hamar urte atzerago, artean gazte ginelarik, zenbait lagun (batzuk jada joanak, in memorian) oraingoan ere ondoan nituenak. Errenteriako asanbladaren garaiak. Urte borrokalariak ezbairik gabe; esperantza genuen zerbait handia lortu genuelakoan, eta orain, berriz, gure bizitzaren azken urtetan gaudela, esperantza berari eutsiz, jubilatuen aldarrikapenak lortuko ditugulakoan.
Ez da nostalgia hutsa. Konbentzimendua baizik. Bizitza militante baten aldarrikapena. Euskararen militanteak ginen, ia erdara hutsean egiten ziren asanblada haietan; borroka sozialistaren militanteak ginen batzuek jada sozialismoa baztertzen ari zirenean;abertzaleak ere bai.
Eta eutsi egin diogu orain arte. Gure belaunaldiaren azken mohikanoak deitzen digute. Baina ez gara azkenak, inondik inora. Belaunaldi berriak sorten ari dira, gu garai hartan berriak ginen bezalaxe (hori bai, eskarmentu handikoak). Indar berriak pizten sumatzen ditut: euskarari oldartzen zaion une arriskutsu honetan; indar berriak faxismo berriari aurre egiterakoan, indar berriak naturaren defentsan aldaketa klimatikoaren garai latz hauetan; feminismoaren defentsan emakumeak jazartzen dituzten garai hauetan…
Gure herriko Xenpelarrek , ehun urte atzerago zion bezala: ‘Sortuko dira berrik, gu gera Euskal Herriak’.
Joxe Iriarte Bikila
