Gutuna: "Bizikleta istripua: eskerrak eta zorionak"
Joan den astean, hilaren 16an zehazki, istripua izan zuen txirrindulari batek Lezon. Lezoarren laguntza handia jaso zuen, eta eskertze mezua bidali nahi izan die txirrindulariak hura artatzen eta babesten izan zirenei. Joxe Piñas Sanfacundo da txirrindularia. Hona, hitzez hitz, hark esandakoak:
Bizikleta istripua: eskerrak eta zorionak
Joan den asteartean (ekainak 16) Lezoko Jaizkibel etorbidean bizikleta istripua izan nuen eta une hau aprobetxatu nahi nuke artatu ninduten lezoarrekin harremanetan jarri eta esker oneko hitz pare bat esateko.
Lehenik eta behin, jakina, eskerrak eman nahi dizkizuet hasieratik sentitu nuen babesagatik. Harago, adierazi nahi dizuet harrotasuna sentitu nuela zuen jarreragatik, gizaki apal soil bat bezala.
Gogoan ditut kopetako odola garbitu bitartean eskua hartzen zidaten bi emakumeak, gozotasuna transmititzen zidatenak, baita kezkak kenduz istripuaren arrazoiak azaltzen zituztenak ere. Lurrean gorantz begira nengoela beste pertsona batzuk ikusten nituen: bizardun batek lasaitasunez hitz egiten zidana telefonoko deiak egiten zituen bitartean (udaltzainei, anbulantziari…); baita neska gazte bat ere, bere aurpegi kezkatiak enpatia transmititzen zidana; udaltzainak, gertutasuna adierazi eta zentzuzko laguntza eman zidatenak… Eta inguruan pertsona gehiago zineten, nahiz eta ezin zintuztedan ondo ikusi lepoa ezin nuelako biratu. Zuen babesa ere sentitu nuen.
Hor zineten denak, lezoar anonimoak, ezezagun bat artatzen, zaintzen,… Eta, zuek horrela ikusita, ikuspegi mugatu horretatik eta egoera makur horretan, poza sentitzea lortu zenutela adierazi nahi dizuet.
Gaur egungo gizarte honek erronka handiak dituela esaten ohi da; kohesioa, elkarren zaintza, herritartasuna… Ez dut Lezo asko ezagutzen, baina asteartean bizi izan nuenagatik erronka horiei aurre egiteko gaitasuna duen herri bat osatzen duzuela esango nuke.
Eskerrik asko eta zorionak!
Joxe Piñas Sanfacundo.
