NLAOKEU
Luze jo du Lekuonaren irekierak. Abiapuntu batetik hasi eta aldatzen joan den egitasmoa izan da. Bidean gorabeherak eta jakin-min ugari sortu dituena. Ke arteko egunak. Inauguratu berri dute. Eta asko dira, ziurrenik, sortutako ilusioak, zalantzak eta hausnarketak.
Herrigintzan, euskalgintzan, politikan, enpresa pribatuan eta azken urteetan administrazio publikoan aritu ondoren, honakoak etorri zaizkit burura.
Euskara eta euskal kultura
Euskarak arnasguneak premiazkoak ditu. Euskara oinarri izango duten espazioak; herrigintzatik sortutakoak edota garatutakoak izango direnak gehienak. Hala izango al dira baliabide eta neurri politikoek abiatutakoak? Euskarak ez du berezko lerroa sortzea behar. Alderantziz, hezurdura izatea merezi du. Gainontzeko herritarren errealitateak baztertu gabe, guretik abiatzea eta elkartrukean osatzea. Azala eta mamia. Nola bestela?
Eta euskal kulturak sinbologia hutsetik urrutirago ausartzea ezinbestekoa du, eguneroko jardunean lotsarik gabe aritzea. Hitzak, irudiak, doinuak. Hizkuntzaz elikatutako euskal kultura sortzea eta zabaltzea, euskal izaeraz osatutako herri kulturan bizitzea. Euskal kultura berritzailea.
Kultur kudeaketa
Kulturak ere kudeaketaz aritzea behar du. Kulturak ez du herritar guztien artean ospe berdina. Diru publikoarekin ordainduta? Egitasmo politikoek, arrastoa uztea baino, berariazko azterketa eta garapen teknikoetan oinarritzea behar dute. Kultur proiektu arrakastatsuek programazio sendoaz gain, planifikazio zehatzak, askotariko baliabideen antolaketa eta ikuspegi ekonomikoa kontuan izatea. Eta hori guztia herriko eragileen parte hartzea bermatuta, artikulazioa. Artista horiek! Eragin positiboa aurreikustea, lehenestea eta azaleratzea; eskainitako zerbitzuetan, egindako gastuetan eta baita inguruan sortutako ekonomia sozialean ere. Berrikuntzaren kultura eta ongizatea. Barrua eta kanpoa.
Erreferentziak
Non begiratu? Gizarte aldakorrari aurre egiteko malgutasunez jokatzea, ikastea, garrantzitsua da. Kalean ikusi nahi ditugun balioetan eredu bilakatzea. Ikerketa eta pentsamendu kritikoa sustatuko dituen kultura-berrikuntza, estrategikoa. Lurralde ikuspegia zainduko badugu, txikitik handira abiatzeko beldurrik ez izatea. Herrigintzatik sortutako gertuko ereduei begiratzea?
Nork nori begiratu? Profesionalak eta hasi berriak. Adituak, arituak eta balizko akituak bildu. Diziplina anitzak? Azken finean, ilusioz betetako espazio sortzaileek sortuko baitituzte erreferentzia berriak.
Urteetan goizaldera jan ditugun croissant egin berriak bezain onak izango al dira Lekuona Fabrikan hurrengo hilabeteetan dastatuko ditugunak?
