EH Bilduk Antxoko trenbidearen lurperatzea lehenetsi behar dela iritzi dio
Altza- Pasai Antxo- Galtzaraborda arteko proiektuari ekin diezaioten eskatzeko mozioak aurkeztuko dituzte Pasaian, Donostian eta Batzar Nagusietan.
Donostiako pasanteari Altza-Pasai Antxo-Galtzaraborda arteko trenbidearen proiektua lehenetsi behar zaiola iritzi du EH Bilduk eta bere jarera azaltzeko prentsaurrekoa egin du Pasaiako taldeak, Antxon. Iragarri dutenez, eskaera bideratzeko mozioak aurkeztuko dituzte, Pasaiako Udalean, Donostiakoan eta Batzar Nagusietan. Pasaiako EH Bilduren ustez, “biziberritzea pasaitarren bizi kalitatea hobetzea da”, eta zentzu horretan premiazkoa iruditzen zaio Antxo alderik alde zeharkatzen duen trenbidea lurperatzea: “Badira 100 urte Antxoko biztanleek herria bitan banatzen duen bidezubi hau jasaten dutela, horrek dakartzan kutsadura eta arriskuekin”, salatu dute, eta “lehen mailako arkitektura-oztopo bat” dela nabarmendu dute, “zarata, iluntasuna eta segurtasun faltaren” sorburu. Finantzazioa Altza eta Galtzaraborda arteko trenbidearen proiektuak 70 milioi euroko aurrekontua du, EH Bilduk esan duenez. Donostiako pasantearenak, aldiz, 200 milioi eurokoa. Horregatik, beldur da koalizio abertzalea, Donostiako erdiguneko metro igarobidea lehenetsiko balitz, Altza eta Galtzaraborda arteko proiektua ” urteetarako hipotekatua” geratuko ote den. Izan ere, berez, Euskotrenek aurten ekin behar zion proiekturi, baina lanak atzeratu dituzte, epe edo data zehatzik gabe. Pasaiako EH Bilduk iragarri duenez, hurrengo plenoaren aurretik –mozioa orduan eztabaidatuko dutela espero dute– gaiaren gaineko hitzaldia egingo dute Antxon, herritarrei proiektuaren berri emateko.