Martin Beramendi absolbitu dute, bi auzietan

Txarako parkean egotzitako prebarikazioaren kasuan eta udaletik ustez dokumentazioa ateratzeko auzian absolbitu dute Oiartzungo alkate ohia.

Erik Gartzia Egaña

Oiartzun

2017/01/19

Martin Beramendi, Oiartzungo alkate zen garaian.

Martin Beramendi 2003 eta 2007 urteen artean Oiartzungo alkate izandakoa absolbitu dute, irekiak zituen bi auzietan. Lehenengo auzian, udaleko hainbat dokumentu Alkartetxera eraman izana leporatu zioten (Eusko Alkartasunako militantea zen garai hartan). Abenduan izan zen epaiketa, eta orain atera dute sententzia. Ebatzitakoaren arabera, “ez da frogatuta geratu” Beramendik “jatorrizko dokumentuak edo originalak, edo bere kasuan, dokumentu bakarrak” EAren egoitzara eraman zituenik. Bigarren kasuan, Txarako parkean ustez egindako prebarikazioa egozten ziona da. Parkea txukuntzeko obretan gainkostua baimendu zuela leporatu zion fiskaltzak. 1,2 milioi eurotik 2,2 milioira igo zen kostua, eta Beramendi buru zuen udal gobernuak ordeztu zutenek enpresekin adostasun batera iritsi behar izan zuten. Epaileak, baina, ez du deliturik ikusi. Epaiaren arabera, alkate ohia jakitun ez zelako “legez kanpoko edo arbitrariotasunean oinarritutako zerbait” egiten ari zela, ez obren aldaketak agintzerakoan ezta espedientea hasi ez zuenean ere.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.