Atzo omendu zituztenak, alkate eta dantzariekin.
Urtero bezala, Xanisteban Egunaren bezperaren bezperan, kultur ekitaldia egin dute. Herriko seme-alaba eta eragile ugari omendu zituzten udaletxeko pleno aretoan atzo egin zuten ekitaldian.
Txistularien doinuekin batera sartu zen publikoa, lehendabizi, eta omenduak, ondoren. Josune Cousillas eta Ioritz Aizpuru zinegotziek egin zituzten aurkezle lanak. Lehenik eta behin,
aurten hil den Iñaki Arbelaitzentzako esker oneko hitzak izan zituzten, herriaren alde egindako guztiagatik. Ondoren, Jexux Leonet alkateari pasatu zioten hitza. Oiartzunen, aurten, kulturaren arloan jasotako uzta aletu zuen alkateak. Xanistebanetarako, aurten ere, bi aukera eman zituen, xanistebanetan gozatu ezin dutenak gogoan izan ondoren: “Ongi pasa ala ongi pasa”.
Memoria berreskuratu
Aurtengo
urtekariaren —47.a da— eta Mugarriren aurkezpen ofizialerako tartea ere izan zen. Urtekariaren gaiei errepasoa eman ondoren, Mugarriren 24. zenbakia egiteko ardura izan zuten Suberri Matelo eta Anton Mendizabal igo ziren oholtzara. Artikutzako trenari buruz idatzi dute. “Orain idealizatua dugun paraje hura industriala zen duela ehun urte”, esan zuen Matelok. Mendizabalek, bere aldetik, azaldu zuen Mugarri denentzako erakargarri egiten saiatu direla. Horrez gain, iragarri zuen urriaren 8an Artikutzako Trenaren Eguna egingo dutela.
Herriko ondarea berreskuratzeko lanetan aritu diren bakarrak ez dira. Beloagako gazteluan lanean ari direnei ere aitortza egin zieten. Belgoaga Bizirik-eko Joxe Mari Iturriotzek jakinarazi zuenez, datorren urterako gazteluaren irisgarritasuna hobetuko dute, bertara hurbildu nahi duenarentzat. Nabarralde elkarteak gazteluari buruzko dokumentalaren zatitxo bat ere emititu zuten (abenduan estreinatuko dute). Ez zen omendu zuten elkarte bakarra izan: 1936ko Gerrak eta haren ondorioen memoria berreskuratzen duen Kattin Txiki elkarteari ere oroigarria eman zieten.
Kartelak eta dantza
Urtero bezala, xanistebanetako kartel lehiaketako irabazleei sariak emateko probestu zuten ekitaldia. Honakoak izan dira saridunak: 2. akzesita, Silvia Morata; 1. akzesita, Angel Blanco Egoskozabal; oiartzuar onena (irabazlearenaz gain), Onintza Etxebeste; eta kartel iragarlea, Eneko Salaberria. 100TZE sormen espaziorako bekak ere banatu zituzten gaztetxoen artean.
Alaitz Bergaretxek ere jaso zuen aipamena. Urteak daramatza Udalbatzako kideei soka dantza irakasten. Emozionatuta jaso zuen saria, eta etxekoak, txistulariak eta irakasle izan zuen Maixabel Oroz izan zituen gogoan. Gaur arratsaldean, txupinazoaren aurretik, zinegotziek eta Demoarsoko kideek praktikan jarriko dute ikasitakoa.
Txomin Perurena
Bukaerarako utzi zuten Txomin Perurena ziklista handi izandakoa omentzeko tartea. Arritxu Iribar kazetariarekin solasaldi antzekoa egin zuen Perurenak, eta bere ibilbideko garaipenak eta bitxikeriak kontatu zituen. Horrela, esan zuen bi gurpilen gainean eman zituen lehen bueltak Altzibarko tabernaren kanpoan bizikleta uzten zutenei lapurtuta eman zituela.
1974ko Frantziako Tourrean irabazitako mendiko maillota ere aipatu zuen. Hala, maillot hura etapa bat irabazteagatik aldatuko lukeela pentsatzen zuen. “Baina handik urte batzuetara”, jarraitu zuen Perurenak, “jendea etortzen zitzaidan bere seme-alaba edo bilobei esanez ‘Honek mendiko maillota irabazi zuen’ eta hobeto pentsatu nuen”. Bitxikierien zerrenda ez zuen hor bukatu.
Bere garaikur guztiak Oiartzungo Udalari eman zizkion Perurenak, baina atzo jasotakoak ez zizkiela emango iragarri zuen, barre artean. Gaur arratsaldean, Joxe Manuel eta Miguel Mari Lasa anaiekin batera, festak iragartzen dituen
altxafuegoa botatzeko ardura izango du txirrindulariak.
Ekitaldia bukatzean, ohorezko kontrapasa dantzatu zieten omendu guztiei. Gainera, Perurenari buruzko erakusketa inauguratu zuten, herriko tabernek eskainitako luntxarekin gozatzen zuten bitartean.
Gaur festa hasiko da, modu ofizialean.
