Laboratorio zientifikoa, zientzia hobeto ezagutzeko
CSI telesailean bezala ibili dira gaur goizean bi haur talde Zumardian jarri duten laborategi zientifikoan. Luminol eta argi ultramoreekin fluoreszenteak diren gorputzeko atalak ezagutu ahal izan dituzte batzuk. Hormaren beste aldean, berriz, mikroskopioaren laguntzarekin, hainbat elementuren zelulak ikusten aritu dira beste batzuk. Izan ere, MoviLab laborategi zientifikoa ekarri dute herrira. Ostirala bitartean, Zumardian jarrita egongo da 10:00etatik 19:00etara. Hori bai, eguerdian itxi egingo dute 14:00etatik 16:00etara. Gaur goizean aurkeztu dute laborategia Jose Angel Rodriguez Gazteria zinegotziak, Joaquin Acosta alkateordeak eta Mercedes Alonso proiektuaren koordinatzaileak. Alonsok azaldu duenez, Gipuzkoara lehen aldia da MoviLab laborategia ekartzen dutela. Datorren urtera begira, beste herriren batera eramatea aurreikusten dute. Espainiako Zientzia eta Berrikuntza Ministerioak, CSIC Ikerketa Zientifikoen Kontseilu Nagusiak, Espainiako Zientzia eta Teknologia Fundazioak, Padrosa Fundaciok eta Repsol fundazioak sustatutako proiektua da. Egunotan herriko ikastetxe, Gazteleku eta erretiratuen elkarteetako kideak joango dira laborategia bisitatzera. Hala, %75eko okupazioa izango du MoviLabek. Hala eta guztiz ere, herritar guztiak gonbidatu dituzte laborategitik pasatzera, batik bat arratsaldetan, “zientzia hobeto ezagutzeko”. Bi gune Laborategia bi gunetan banatuta dago, eta bakoitzean tailer espezifiko batzuk egiten dira. Lehenengoan argia egiteko hainbat forma aztertuko dituzte. Horrez gain, erreakzio kimikoak ikertuko dituzte, odolaren arrastoekin, esaterako. Bigarrengoan, berriz, kimikaren hainbat kontzeptu landuko dituzte; hala nola, [...]
CSI telesailean bezala ibili dira gaur goizean bi haur talde Zumardian jarri duten laborategi zientifikoan. Luminol eta argi ultramoreekin fluoreszenteak diren gorputzeko atalak ezagutu ahal izan dituzte batzuk. Hormaren beste aldean, berriz, mikroskopioaren laguntzarekin, hainbat elementuren zelulak ikusten aritu dira beste batzuk.
Izan ere, MoviLab laborategi zientifikoa ekarri dute herrira. Ostirala bitartean, Zumardian jarrita egongo da 10:00etatik 19:00etara. Hori bai, eguerdian itxi egingo dute 14:00etatik 16:00etara.
Gaur goizean aurkeztu dute laborategia Jose Angel Rodriguez Gazteria zinegotziak, Joaquin Acosta alkateordeak eta Mercedes Alonso proiektuaren koordinatzaileak. Alonsok azaldu duenez, Gipuzkoara lehen aldia da MoviLab laborategia ekartzen dutela. Datorren urtera begira, beste herriren batera eramatea aurreikusten dute. Espainiako Zientzia eta Berrikuntza Ministerioak, CSIC Ikerketa Zientifikoen Kontseilu Nagusiak, Espainiako Zientzia eta Teknologia Fundazioak, Padrosa Fundaciok eta Repsol fundazioak sustatutako proiektua da.
Egunotan herriko ikastetxe, Gazteleku eta erretiratuen elkarteetako kideak joango dira laborategia bisitatzera. Hala, %75eko okupazioa izango du MoviLabek. Hala eta guztiz ere, herritar guztiak gonbidatu dituzte laborategitik pasatzera, batik bat arratsaldetan, “zientzia hobeto ezagutzeko”.
Bi gune
Laborategia bi gunetan banatuta dago, eta bakoitzean tailer espezifiko batzuk egiten dira. Lehenengoan argia egiteko hainbat forma aztertuko dituzte. Horrez gain, erreakzio kimikoak ikertuko dituzte, odolaren arrastoekin, esaterako. Bigarrengoan, berriz, kimikaren hainbat kontzeptu landuko dituzte; hala nola, Errenteriako ura aztertzeko, herriko uraren gogortasuna, esaterako. Toki berean, mikroskopioaren laguntzarekin hainbat lagin begiratuko dituzte.
