Urteetan emandako zerbitzuarengatik diplomak, hainbat udaltzainentzat
Errenteriako Udalak udaltzain bezala 20 eta 30 urte bete dituzten udaltzainei aitortza egin die, eta atzo goizean diplomak eta bereizgarriak banatu zizkieten. Hamabi udaltzain izan ziren Errenteriako udaletxeko areto nagusian aitortza jasotzen, baina J...
Errenteriako Udalak udaltzain bezala 20 eta 30 urte bete dituzten udaltzainei aitortza egin die, eta atzo goizean diplomak eta bereizgarriak banatu zizkieten. Hamabi udaltzain izan ziren Errenteriako udaletxeko areto nagusian aitortza jasotzen, baina Juan Carlos Merino alkateak adierazi zuenez, gehiago izan dira nahiz eta denek ez zuten joaterik izan.
Merinorekin batera, Luis Andres zinegotzia eta Jose Luis Gundin Udaltzainen burua zeuden diplomak banatzen. Hain zuzen, Gundinek berak diploma eta bereizgarria jaso zituen 30 urtetik gora egin baititu Udaltzaingoan.
Gundinekin batera Joxean Ugartemendiak, Salvador Caceresek eta Vicente Urbietak bete dituzte 30 urtetik gora udaltzain postuan.
Horiez gain, hogei urtetik gora egin dituzten honako udaltzain hauek jaso zuten diploma eta bereizgarria atzo: Pablo Martin; Pedro Cazorla; Gabriel Rivera; Juanma Ros; Francisco Ledo; Juan Enrique Bengoetxea; Manuel Otegi eta Manuel Garcia.
Merino alkateak udaltzainen lana nabarmendu zuen, oro har, herritarrei ematen dieten zerbitzuarengatik. Hala, lan “bikaina” egiten dutela esan zuen. Askotan herritarrengandik kexak eta hitz itsusiak jasan behar izaten dutela azaldu zuen Merinok, baina gogorarazi zuen udaltzainaren lana ez dela isunetara bakarrik mugatzen eta herritarrei laguntzeko lan handia egiten dutela, galduta dagoen pertsona batetik hasita, bizitzak salbatzera arte.
Halako ekimenen bidez, udaltzainen lana ezagutzera eman nahi dutela nabarmendu zuen.
