Espainiako Auzitegi Gorenak Bildu hauteskundeetatik kanpo uztea gogor kritikatu zuten atzo koalizioko Irungo ordezkariek. Eusko Alkartasunaren egoitzan egin zuten prentsa agerraldian Gorenaren erabakia “onartezina” dela nabarmendu zuten. Horregatik, PSE-EEko kideei ilegalizazioaren alde edo kontra dauden zehazteko eskatu, eta herritarrei dei egin diete baliogabetzeen kontra bihar eta etzi egingo diren mobilizazioetan parte hartzeko.
Espainiako Estatuko Abokatuaren eta Fiskaltzaren inpugnazio eskaerei erantzunez, Gorenak Bilduren 254 zerrenda hauteskundeetatik kanpo uztea erabaki zuen igandean, horien artean Oarsoaldekoak eta Bidasokoak. Bilduren ordezkariek oso larritzat jo dute Gorenaren “betoa”. “Gehiengo batek gatazka egoera gainditu, prozesu demokratiko bat bultzatu eta bakea eraikitzeko apustua egin dugun bitartean, beste batzuk errepresioa, ilegalizazioak eta gatazkaren zurrunbiloarekin ito nahi gaituzte”, salatu zuten, eta alderdi sozialista egin dute egoeraren erantzule: “Erabaki politikoa izan da, eta ez judiziala”. EAJ, EB-Berdeak eta Aralarrekin elkartu direla jakinarazi zuten ere, “urrats berriak emateko garaia” dela uste dutelako.
Espainiako Auzitegi Konstituzionalaren erabakia alde batekoa edo beste aldekoa izanik ere, “aurrera jarraitzeko” asmoa agertu zuen Irungo Bilduk. Hauteskunde kanpainian izango direla ziurtatu zuten, eta “ezkertiarrei eta abertzaleei” laguntza eskatu zieten. Zentzu horretan, joan zen larunbatean zerrenda aurkezteko ekitaldian Udal Kontserbatorioko auditorioa bete izanagatik pozik agertu ziren koalizioko kideak, baita Gorenaren erabakiaren kontra atzo Txanaleta plazatik abiatuta egin zen manifestazio jendetsuarengatik. Pasaian (irudian), Oiartzunen, Errenteria-Oreretan, Lezon eta Hondarribian ere egin zituzten elkarretaratzeak.
Mobilizazioak bihar eta etzi
Bestalde, gaur Bilbora joateko deia egin zuten. Biharko gauerdira arteko epea du Konstituzionalak koalizioko abokatuek aurkeztutako helegitea aztertu eta behin betiko erabakia hartzeko. Hori dela eta, manifestazioa abiatuko da Jesusen Bihotzetik, 20:00etan. Ondoren elkarretaratzea egingo dute Moyua plazan, Espainiako Gobernuaren Ordezkaritzaren aurrean, Konstituzionalaren erabakia ezagutu artean.
Sindikatuak
Gorenak Bildu hauteskundeetatik kanpo uzteko igandean hartutako erabakia gogor errefusatu dute ELA, LAB, STEE-EILAS, EHNE eta HIRU sindikatuek. Gehiengo sindikalak Espainiako presidente Jose Luis Rodriguez Zapatero egiten dute Gorenaren epaiaren erantzule, “goitik behera politikako eta hedabideetako eskuin muturrak ezartzen dion agenda betetzen” duelako. Oharraren sinatzaileek «eskubide demokratikoen alde eta aukera guztien parte hartze politikoa» defendatu dute.
Amaitzeko, “normalizazio agertoki baten aldeko konpromisoa hartzeko” galdegin dio gehiengo sindikalak Madrilgo gobernuari, eta bihar,
Eskubide guztiak denontzat, ilegalizaziorik ez! lelopean egingo diren elkarretaratzeetan parte hartzeko dei egin diote euskal langileriari.
Gehiengo sindikalaren deialdiak, etzi, 11:30ean
Errenteria-Orereta. Udaletxean eta Txirrita Maleo poligonoan (Iberconta).
Bilduren aldeko elkarretaratzea, Donibaneko Santiago plazan
Pasaia. Trintxerpen, alkateordetzan. Donibanen, udaletxean.
Lezo. Udaletxean eta 110 industrialdean.
Oiartzun. Udaletxean, Lintzirinen (Catelsa enpresaren parean) eta Urkiako biribilgunean (Mamut).
Hondarribia. Miramarreko biribilgunearen parean.
Irun. Zaisako dorrean, Zabaltza plazan eta CAF enpresan (Anaka).