Kaleko argiteria kontrolatuko dute energia aurrezteko
Udalak energia aurreztearen aldeko apostua egin du eta bide horretan kaleko argiteriaren kontsumoa murrizteko, kontsumo urriko argiak, kontrol sistema eraginkorragoak eta EVEk (Energiaren Euskal Erakundea) diruztatutako tresnak eta neurriak ezarri ditu...
Udalak energia aurreztearen aldeko apostua egin du eta bide horretan kaleko argiteriaren kontsumoa murrizteko, kontsumo urriko argiak, kontrol sistema eraginkorragoak eta EVEk (Energiaren Euskal Erakundea) diruztatutako tresnak eta neurriak ezarri dituzte.
Zerbitzuetako zinegotzi den Juan Mari Altunak azaldu duenaren arabera, «urteotan lan eta inbertsio handia egin da energia aurreztu, kutsadura gutxitu eta ekonomia hobetzeko». Udalak 2011 urteko argindar fakturak ordaintzeko 260.000 euroko aurrekontua onartu du eta zentzu horretan, energia aurrezteko helburuarekin hainbat neurri hartu dituzte. “Herrian 2.890 luminaria daude, eta ezarritako neurriei esker, iaz 30.000 euro inguruko aurrezkia lortu genuen”, esan du Altunak.
Kaleko argiteriaren %30 kontsumo urriko instalakuntzak dira eta urteotan kale osoak argiztatzen dituzten 30 elektrika-kaxen aldamenean, argindarraren intentsitatea gutxitzeko ahalmena duten erreduktora-estabilizadora tresnak ezarri dituzte. Udal Brigadako elektrikari arduraduna den Jesus Mari Arozenak azaldu duenez, tresna hauei esker, “goizeko ordubietatik aurrera, farolak itzali gabe intentsitatea galtzen dute %40 inguru aurreztuz”.
90 tona CO2 gutxiago
Bestalde, GeoDoss programa informatikoari esker, kaleko argi guztien mantenimendu lanen kudeaketa ordenagailu baten bidez kontrola dezakete gaur egun. Orain arte hartutako neurri hauei guztiei esker, Hondarribiko Udalak 2009an kontsumitutako argindarrarekin alderatuta, 29.721 euroko aurrezkia lortu zuen iaz, eta aurten ere, kaleko argiteriak eragindako 90 tona CO2 gutxiago zabalduko ditu Hondarribiak ingurumenera.