Xanet Arozena: “Oiartzunek aurrera egin dezan egingo dugu lana” (elkarrizketa osoa)
Xanet Arozena (Oiartzun, 1972) da Hamaikabaten (H1!) hautagaia Oiartzungo alkatetzarako. Pasa den legegintzaldiko balorazioa egin, eta datorren legegintzaldirako H1ek herrian dituen asmoen berri eman du. Aurreko legegintzaldiko Gobernuaren jarduna ezetz esatean oinarritu dela dio H1en hautagaiak eta herriak aurrera beharrean, atzera egin duela. Zein balorazio egiten duzu azkeneko legegintzaldiaz? OiartzunBai (OB) taldearen lanaz egingo dut balorazioa. Guk, OB bezala, hiru esparru landu ditugu, batik bat. Batetik, auzoen biziberritzea borrokatu dugu, ikusi genuelako ezker abertzaleak ez zuela hori garatzeko inolako borondaterik. Eta hala izan da. Dena geldiarazi zuten hasieratik eta, azkenean, Oiartzungo auzoak dagoeneko eduki behar zituzten zerbitzurik gabe gelditu dira. Bestetik, etxebizitza politika landu dugu. Ezker abertzaleak 2010 bukaera aldera onartu zituen arau subsidiarioetan, azkenean, etxebizitzez hitz egiten da, ez gehiago. Baina etxebizitza horiek ez dira garatuko ez dakigu zenbat urtetan. Eta Arraguakoek eta Altzibarkoek dagoeneko eginda egon behar lukete. Eta ez badira egin, beraien borondate faltagatik izan da. Beste alde batetik, gazteria politika ere landu dugu. Legegintzaldi bukaera aldera etorri zaigun gaia da. Legegintzaldian martxan jarri zuten gazteria politika lehen aldiz, eta hori garatu beharrean eta aurrera egin beharrean, ikusita ezker abertzaleak dena bertan behera utzi nahi zuela berriro, gu saiatu gara aldarrikatzen Oiartzunen beharrezkoa dela gazteria politika bat. [...]
Xanet Arozena (Oiartzun, 1972) da Hamaikabaten (H1!) hautagaia Oiartzungo alkatetzarako. Pasa den legegintzaldiko balorazioa egin, eta datorren legegintzaldirako H1ek herrian dituen asmoen berri eman du. Aurreko legegintzaldiko Gobernuaren jarduna ezetz esatean oinarritu dela dio H1en hautagaiak eta herriak aurrera beharrean, atzera egin duela.
Zein balorazio egiten duzu azkeneko legegintzaldiaz?
OiartzunBai (OB) taldearen lanaz egingo dut balorazioa. Guk, OB bezala, hiru esparru landu ditugu, batik bat. Batetik, auzoen biziberritzea borrokatu dugu, ikusi genuelako ezker abertzaleak ez zuela hori garatzeko inolako borondaterik. Eta hala izan da. Dena geldiarazi zuten hasieratik eta, azkenean, Oiartzungo auzoak dagoeneko eduki behar zituzten zerbitzurik gabe gelditu dira. Bestetik, etxebizitza politika landu dugu. Ezker abertzaleak 2010 bukaera aldera onartu zituen arau subsidiarioetan, azkenean, etxebizitzez hitz egiten da, ez gehiago. Baina etxebizitza horiek ez dira garatuko ez dakigu zenbat urtetan. Eta Arraguakoek eta Altzibarkoek dagoeneko eginda egon behar lukete. Eta ez badira egin, beraien borondate faltagatik izan da. Beste alde batetik, gazteria politika ere landu dugu. Legegintzaldi bukaera aldera etorri zaigun gaia da. Legegintzaldian martxan jarri zuten gazteria politika lehen aldiz, eta hori garatu beharrean eta aurrera egin beharrean, ikusita ezker abertzaleak dena bertan behera utzi nahi zuela berriro, gu saiatu gara aldarrikatzen Oiartzunen beharrezkoa dela gazteria politika bat. Horrez gain, dudarik gabe, parte hartzearen eta gardentasunaren gainean zeresan handia dago. Esan ziguten parte hartzearen legegintzaldia izango zela, eta guk geuk ere informazioa lortzeko zailtasunak topatu ditugu. Sortu duten enpresarekin, adibidez, ezin izan dugu jarraipen bat egin. Datuak eskatu genituen eta ez dizkigute eman. Parte hartzearen inguruan, zer esan? Atez atekoaren gaineko galdeketa egiteko eskatu zuten herritarrek, 1.500 inguru izan ziren galdeketa eskatu zutenak, eta Udalak aurpegira barre egin die. Guk borrokatu ditugunak horiek izan dira gehienbat. Gainera, saiatu gara jendearengana iristen, prentsaren bitartez, aldizkariaren bitartez… Egindako lanarekin oso pozik gaude.
Eta zein balorazio egiten duzu Udalaren jardunaz?
Nire ustez, egin duen gutxi hori Espainiako Gobernuaren Herri Inbertsiorako Funtsari esker egin du (Plan E delakoari esker). Udal Gobernu Taldearen gainontzeko jardun guztia ezezkoan oinarritutakoa izan da: ‘gelditu, hau ez, hura ez…’. Beti ez.
Zein dira zuen lan ildo nagusiak datorren legegintzaldirako?
Aurreko legegintzaldian gai nagusienetako bat hondakinen kudeaketa izan da eta gure proposamena bosgarren edukiontzia jartzea da. Guk bosgarren edukiontzia bultzatzen eta babesten dugu, eta uste dugu egokiena eta jasangarriena dela, eta emaitza onak ematen dituela. Guk galdeketa deituko genuke, aurreko Gobernuak ez bezala. Eta eskaera bera luzatzen diogu gobernura iristen denari. Tokatzen dena tokatu, espero dugu galdeketa egitea. Eta guk bosgarren edukiontzia defendatuko dugu. Horrez gain, hasteko, bultzatuko dugu auzoen biziberritzea. Behar-beharrezkoa da. Guk uste dugu Udalean egiten den kudeaketa hobetzeko dela, herritarren bizitza kalitatea hobetzeko. Guk lana egingo dugu auzoen biziberritzea bermatzeko. Dudarik gabe, gainera, Oiartzungo gazteek Oiartzunen bizitzeko aukera izan dezaten lan egingo dugu, eta, gainera, ondo bizitzeko aukera izan dezaten, etxebizitza duinarekin: alokairuan, salmentakoan… Dena delakoan, baina saiatuko gara babes ofizialeko etxebizitzak bultzatzen, indar handiz. Beste alde batetik, saiatuko gara gardentasuna bilatzen. Gardentasunarekin oso zorrotzak izango gara. Ez dugu utziko, inola ere, azkeneko legegintzaldian gertatu dena errepika dadin. Egiten dugun guztia herritarrei argi eta garbi azalduko diegu: zer ari garen egiten, zergatik eta zertarako. Eta parte hartzea bultzatuko dugu. Nola? Inongo zalantzarik gabe atez atekoaren gaineko galdeketa egin behar da. Horrez gain, herritarrei hitza ematen diegu egiten dizkiguten galdeketa eskaerak tramitatuko ditugula. Ondoren, Espainiako Gobernuak eman behar du baimena, baina guk tramitatuko dizkiegu. Eta dudarik gabe, parte hartzeko topatzen ditugun bide guztiak irekitzen saiatuko gara. Ez da kontua bilerak egitea bakarrik, baizik eta idatziz proposamenak, kexak… jasotzea, baita helbide elektroniko bidez… Parte hartzeko dauden hainbat sistema bultzatzen saiatuko gara.
Oiartzunen kasuan, zergatik ez da errepikatu OiartzunBai formula, EAJren eta Hamaikabaten parte hartzearekin?
Hori EAJk erantzun beharko luke.
EAJk esan du asanblean erabaki zutela bakarrik aurkeztea eta formula ez errepikatzea.
Guk azalpenak eskatu ditugu, eta jaso dugun erantzuna ez da bide ofizialetik etorri. Jakin dugunaren arabera, OBk egindako lanarekin gustura daude, baina beraiek nahiago dute euren izena eta euren siglak ikustea. OBrekin ez omen da ikusi EAJ. Guk erantzun dugu H1! ere ez dela ikusi, izan ere OB zelako formula eta apustu horretan denak gustura ginen, baina nahiago izan dute alderdikeriaz jokatu eta beren alderdiaren siglak aurkeztu, alternatibaren eta elkarlanaren gainetik. Ez dugu ulertzen zergatik, baina horrela azaldu digute.
Aurrekanpaina Bilduren gaiak markatu du gehienbat. Nola bizi izan duzue?
Ezer baino lehen, guk argitu behar dugu H1etik, beti egon garela ilegalizazioen kontra. Beti kritikatu dugu alderdiak eta ideologiak legez kanpo uztea. Inongo zalantzarik gabe. Ostegun gaueko berria berri ona dela uste dugu. Denok parte hartzeko aukera izango dugu, parte hartzea delako, azkenean, demokraziak daukan adierazpenik handiena. Hori batetik. Bestetik, ona da behingoz egoera argitzea eta Bildu ere proposamenak egiten hastea. Oraingoz ez du ezer proposatu, eta uste dut Bilduri kanpaina egin zaiola. Dagoeneko ez du zertan ezer aurkeztu, zuzenean boto asko jasoko baititu gertatu zaionagatik, tamalez. Baina bere proposamenak egin behar ditu eta horren zain gaude. Beste puntu bat ere aipatu nahiko nuke, oso garrantzitsua iruditzen zaidana: Bildu osatzen duten talde ezberdin horiek, 2003an eta 2007an karguak hartu zituzten, inolako dudarik erakutsi gabe eta ilegalizazio batzuen aurrean. Zer gertatzen da orain? Ia ilegalizatu zituztenean, gainontzeko taldeetako kideoi eskatu ziguten karguak ez hartzeko. Hori horrela izanda, argumentuak berriro planteatu beharko lituzkete, horrela argi eta garbi esaten ari direlako aurreko ilegalizazioak zilegi zirela. Talde horiek zilegitasuna aitortzen ari dira, baina eurek ikusiko dute. Guk hasieratik esan dugu ilegalizazioen kontra gaude, baina erakundeak ezin dira hutsik utzi. Azkenean, herritarren bizitza kalitatearen alde egin behar dugu, eta horretarako beharrezkoak diren bide guztiak eta parte hartzeko modu guztiak bilatu behar dira. Bildu ez balitz egongo, bilatuko genuke beste formula bat haiek ere parte hartzeko, inolako dudarik gabe egon, egon behar dutelako.
Maiatzaren 22ra begira jarrita. Zenbat zinegotzi espero dituzue?
Ahal diren gehienak, baina herriak esaten duenaren zain gaude, herritarrek esango dute zenbat zinegotzi eduki behar ditugun. Gu kanpaina garbi bat egiten saiatuko gara, eta argi esaten zer egin nahi dugun. Espero dugu ahalik eta gehienak izatea, eta gero `hortik aurrera beharrezko akordioak lortzea. Oiartzunek aurrera egin dezan egingo dugu lana, eta ez atzera, aurreko legegintzaldian egin duten bezala.
