Dantzari Txiki Egunaren barnean 500 haur ariko dira dantzan igandean
Dantzari txiki eguna igandean egingo dute eta 500 haurrek hartuko dute parte
Dantzari Txiki Eguna ospatuko dute igandean Ereintza dantza taldeak antolatuta Errenteria Musikal eta Udalaren laguntzarekin. Aurten zortzi talde ariko dira: Lezoko Murixka; Urretxuko Lurra; Beasaingo Aurkatza; Oiartzungo Haurtzaro; Hernaniko Ttarla; Tolosako Udaberri, Iruñeako Amaiur eta Errenteria-Oreretako Errenteria Musikal-Ereintza. Azken honetan, 280 dantzari arituko direla nabarmendu dute antolatzaileek, eta guztira herriko kaleetan barrena 500 dantzari ibiltzea aurreikusi dute Ereintza Dantza Taldeko kideek.
Goizez eta arratsaldez
Dantzari guztiak Koldo Mitxelena plazan elkartuko dira eta hamaiketakoa egin ondoren herriko kaleetan barrena ibiliko dira 11:30etatik aurrera. Desfilea ordubete beranduago amaituko dute Zumardian eta bertan, oholtzaren gainean egingo dute emanaldia zortzi taldetako dantzariek.
Bazkaltzeko eten ondoren, arratsaldean jarraituko dute Dantzari Txiki Egunarekin izan ere, bostetatik aurrera dantzaldia izango da Zumardian.
Eskerrak eman
Eguraldi txarra egingo balu, antolatutako egitaraua Fanderiako Udal Pilotalekuan egingo dutela azaldu dute antolatzaileek.
Ereintza Dantza taldeko kideek eskerrak eman dizkiete egunaren antolaketan lagundu duten Errenteria Musikaleko ikasleen gurasoei eta dantzari txikientzat bazkaria prestatuko duten elkarte eta komertzioei.