Jantokirako esleitze proposamena egin du Hirigintzak
Elizalde eskolako jantokia handitzeko lanak Alzola SL enpresak egingo ditu. Esleipen proposamena pasa den astean onartu zuen Hirigintza Batzordeak. Hiru enpresa aurkeztu dira lan hauek egiteko eta eskaintzarik onena Alzolarena izan dela jakinarazi dute Udaletik: “463.860,95 euroko aurrekontua izango dute lanek eta bost hilabeteko epean bukatuko dira”. Lanak udan hasiko dituzte, 2010/2011 ikasturtea bukatu ondoren. Urtea bukatzerako, Elizalde eskolako jantokia handitzeko lanak bukatuko dituzte, Udalaren aurreikuspenen arabera. Lanak Udalaren eta Eusko Jaurlaritzaren artean finantzatuko dituzte. Udalak Eusko Jaurlaritzako Hezkuntza Sailetik diru-laguntza lortu du. Honela, %40a Udalak finantzatuko du, eta gainerakoa Eusko Jaurlaritzak. Lanak egiten direnean, Elizalde eskolako jantokiak 505 metro koadro izango ditu, orain baino 150 metro koadro gehiago. Lanak gaur egun eskola barruan jantokia dagoen eremuan egongo dira, eta handitze lanak Kontzejupe aldera egingo dituzte. Lan horiekin batera, bestelako lan batzuk ere egingo dituztela jakinarazi dute Udaletik: “Sukaldea tokiz aldatuko da, aldagelak lekualdatuko dira, elbarrientzako komuna egingo da eta bazterreko horma bota eta berria eraikiko da. Orain, solairu bakarrean egingo dira lanak, baina etorkizunera begira, bigarren solairu bat eraikitzeko aukera izango da, beharrak eskatuz gero”. Elizalde eskolako jantokia handitzeko beharra nabarmena da, eskolan jantoki zerbitzua erabiltzen duten ikasle guztiak ez baitira sartzen gaur egungo jangelan eta ondorioz, bi tokitan [...]
Elizalde eskolako jantokia handitzeko lanak Alzola SL enpresak egingo ditu. Esleipen proposamena pasa den astean onartu zuen Hirigintza Batzordeak. Hiru enpresa aurkeztu dira lan hauek egiteko eta eskaintzarik onena Alzolarena izan dela jakinarazi dute Udaletik: “463.860,95 euroko aurrekontua izango dute lanek eta bost hilabeteko epean bukatuko dira”.
Lanak udan hasiko dituzte, 2010/2011 ikasturtea bukatu ondoren. Urtea bukatzerako, Elizalde eskolako jantokia handitzeko lanak bukatuko dituzte, Udalaren aurreikuspenen arabera.
Lanak Udalaren eta Eusko Jaurlaritzaren artean finantzatuko dituzte. Udalak Eusko Jaurlaritzako Hezkuntza Sailetik diru-laguntza lortu du. Honela, %40a Udalak finantzatuko du, eta gainerakoa Eusko Jaurlaritzak.
Lanak egiten direnean, Elizalde eskolako jantokiak 505 metro koadro izango ditu, orain baino 150 metro koadro gehiago. Lanak gaur egun eskola barruan jantokia dagoen eremuan egongo dira, eta handitze lanak Kontzejupe aldera egingo dituzte.
Lan horiekin batera, bestelako lan batzuk ere egingo dituztela jakinarazi dute Udaletik: “Sukaldea tokiz aldatuko da, aldagelak lekualdatuko dira, elbarrientzako komuna egingo da eta bazterreko horma bota eta berria eraikiko da. Orain, solairu bakarrean egingo dira lanak, baina etorkizunera begira, bigarren solairu bat eraikitzeko aukera izango da, beharrak eskatuz gero”.
Elizalde eskolako jantokia handitzeko beharra nabarmena da, eskolan jantoki zerbitzua erabiltzen duten ikasle guztiak ez baitira sartzen gaur egungo jangelan eta ondorioz, bi tokitan ematen da zerbitzua (Elizalde Herri Eskolako ikasleei eskola eremu barruan eta Elizalde Institutuko ikasleei, eskola eremutik kanpo Udalak alokatuta duen lokal batean).
Lanak bukatzen direnean, jantokian bazkaltzen duten ikasle guztientzako tokia egongo da eskola barruko jantoki berrian.
