Boto zenbaketarekin batera festak egingo ditu Bilduk
Igandean botoak kontatuko ditu Bildu koalizioak hainbat herritan, modu publiko eta irekian. Horien artean, Errenteria-Oreretan eta Oiartzunen.
Lehenengo udalerrian, festa egingo dute Agirre Lehendakariaren plazan (Arenala moduan ere ezagutzen da plaza). Bilduk jakinarazi duenez, boto zenbaketaren jarraipena egingo dute konexioen bitartez, bai herriko auzoetako emaitzak jasotzen, baita beste udalerrietakoak ere. Zenbaketarekin batera hasiko da festa, 20:00etan. Musika emanaldiak, mutxikoak eta bertsolariak ere izango dira bertan. Janariarekin eta edariarekin barra txiki bat ere jarriko dute.
Oiartzunen ere festa egingo dute, Bilduk antolatuta. Madalensoro pilotalekuan elkartuko dira, 19:00etatik aurrera. Gonbite irekia da hori ere.
