Gipuzkoako Aurresku Txapelketak 25 urte egingo ditu herrian
Herritar talde bat bildu eta aurreskuari txoko bat egitearren Gazte Mailako Gipuzkoako Aurresku Txapelketa lehen aldiz antolatu zutenetik 25 urte pasatu dira. Urteurren berezia izango da, eta maila horretako egitaraua antolatu nahi izan dute Landare Elkarteko antolatzaileek. Errenteriako Udalaren eta Euskal Dantzarien Biltzarraren laguntza ere izan dute urte guzti horietan. Asteburua hartu dute 25. urteurreneko ekimenak egiteko. Etzi egingo dute XXV. Gazte Mailako Aurresku Txapelketa, eta horrekin lotuta, egun osoko egitaraua prestatu dute. 12:30ean bilduko dira dantzariak Xabier Olaskoaga plazan, eta bertan, Ereintza Dantza Taldeko neskek soka dantza egingo dute. Horrekin batera, aurreko txapelketetako irabazleei harrera berezia egingo diete. Ondoren, bazkaria egingo dute Landare Elkartean antolatzaileek eta dantzari guztiek. Lehia 17:30etan hasiko da Errenteria Hiria Kulturgunean. Bertan, Gipuzkoan zehar jokatutako ligaxketan posturik onenak lortu dituzten dantzariek parte hartuko dute. 24 izango dira guztira, eta eskualdeko ordezkariak ez dira faltako; 11 izango dira. Bi mailetan banatuko dituzte, adinez sailkatuta: A Sailean, 7-11 urte bitarteko haurrek dantza egin beharko dute, eta B Sailean, berriz, 12-15 urte arteko gaztetxoek. Goizean egindako harreraren ondoren, aurresku txapelketaren ostean aurreko urteetako irabazleak izango dira berriro protagonistak. Hain zuzen, omenaldia egingo diete guztiei, eta oroigarri bana emango diete. Antolatzaileek nabarmendu dutenez, aurreskulari horiek berriro elkartzeko ilusio handia [...]
Herritar talde bat bildu eta aurreskuari txoko bat egitearren Gazte Mailako Gipuzkoako Aurresku Txapelketa lehen aldiz antolatu zutenetik 25 urte pasatu dira. Urteurren berezia izango da, eta maila horretako egitaraua antolatu nahi izan dute Landare Elkarteko antolatzaileek. Errenteriako Udalaren eta Euskal Dantzarien Biltzarraren laguntza ere izan dute urte guzti horietan.
Asteburua hartu dute 25. urteurreneko ekimenak egiteko. Etzi egingo dute XXV. Gazte Mailako Aurresku Txapelketa, eta horrekin lotuta, egun osoko egitaraua prestatu dute. 12:30ean bilduko dira dantzariak Xabier Olaskoaga plazan, eta bertan, Ereintza Dantza Taldeko neskek soka dantza egingo dute. Horrekin batera, aurreko txapelketetako irabazleei harrera berezia egingo diete.
Ondoren, bazkaria egingo dute Landare Elkartean antolatzaileek eta dantzari guztiek.
Lehia 17:30etan hasiko da Errenteria Hiria Kulturgunean. Bertan, Gipuzkoan zehar jokatutako ligaxketan posturik onenak lortu dituzten dantzariek parte hartuko dute. 24 izango dira guztira, eta eskualdeko ordezkariak ez dira faltako; 11 izango dira. Bi mailetan banatuko dituzte, adinez sailkatuta: A Sailean, 7-11 urte bitarteko haurrek dantza egin beharko dute, eta B Sailean, berriz, 12-15 urte arteko gaztetxoek.
Goizean egindako harreraren ondoren, aurresku txapelketaren ostean aurreko urteetako irabazleak izango dira berriro protagonistak. Hain zuzen, omenaldia egingo diete guztiei, eta oroigarri bana emango diete. Antolatzaileek nabarmendu dutenez, aurreskulari horiek berriro elkartzeko ilusio handia daukate, eta interesgarria izango da ekimen hori.
Hurrengo egunean, ekitaldi nagusi bakarra izango da: Kukai Dantza Konpainiaren Hnuy Illa ikuskizuna. Errenteria Hiria Kulturgunean izango da, 19:00etatik aurrera.
Antolatzaileen arabera, herrian ikusmin handia zegoen ikuskizun horrekiko, duela urte batzuk estreinatu zenean erabat bete zelako Errenteria Hiria Kulturgunea, eta herritar asko ikusteke geratu zirelako.
‘Hitza’-k ‘Hnuy Illa’-ko sarrerak zozkatzen ditu
Orain bigarren aukera izango dute Max Saria lortu eta Euskal Herri mailan eta nazioartean aitortza izan duen lana ikusteko. Horretarako, sarrerak beharko dira. Errenteria Hiriko Kulturgunean, Landaren, Arkaitza eta Xenpelar Kultur Dendan salgai daude dagoeneko 10 euroan. Edonola ere, Hitza-ko harpidedunek doan lortzeko aukera izango dute: lau sarrera zozkatuko ditu (bi pertsonentzako bina), eta zozketan parte hartzeko 943 34 03 30 telefono zenbakira deitu behar da.
Hastapenak
1974. urtea zen lehen aldiz Gazte Mailako Aurresku Txapelketa egin zutenean herrian. Urte horretan Iñigo Etxeberria errenteriarrak irabazi zuen txapelketa. Hala ere, antolatzaileentzat garrantzitsuena parte hartzea izan zen. Estreinaldian 90 dantzari biltzea lortu zuten. “Arrakasta izugarria izan zen”, azaldu zuen Juantxo Maiak Landare Elkarteko kideak atzoko aurkezpenean.
Ez ziren garai onak aurreskuarentzat, eta oro har, euskal dantzarentzat, baina ekimen horri esker, beste herrietara hedatzen joan zen. “Informazioa eskatu zigun lehen herria Azkoitia izan zen, eta gero Euskal Dantzari Biltzarra sartu zen. Ideia zen aurrera jarraitzea, beti ere federazioa eta beste herriak dantza sustatzen bazuten, eta horrela izan da”, gaineratu zuen.
Talo Eguna, festa biribiltzeko
Aurresku txapelketarekin batera, Landare Elkarteak Talo Eguna antolatu du etziko. Goizetik hasita, talogileen bizpahiru postu jarriko dituzte Zumardian. Oraingoz, bi dituzte ziurtatuta: Ataungoa eta Oreretakoa. 13:00etan, berriz, muxikoak dantzatuko dituzte, eta arratsaldean taloak egiten ikasteko tailerra jarriko dute. Horrekin batera, gizon orkesta entzun ahal izango da.
