Kutxa buru gainean eramango du Itxaso Ugartemendiak
Urtero bezala, Santiago egunean kutxa entregaren usadioa egingo dute arrantzaleek arrantza oparoa izan dezaten eta aurten, Itxaso Ugartemendia Moreno izango da Santiago eguneko jaian, uztailaren 25ean, kutxa buru gainean eramango duen hondarribiar gazt...
Urtero bezala, Santiago egunean kutxa entregaren usadioa egingo dute arrantzaleek arrantza oparoa izan dezaten eta aurten, Itxaso Ugartemendia Moreno izango da Santiago eguneko jaian, uztailaren 25ean, kutxa buru gainean eramango duen hondarribiar gaztea. Santiago jai egunean, herriko tradiziorik zaharrenetarikoa gogoratzen dute, kutxa entregatzea, eta hau eramango duen Itxaso hondarribiarra izango da eguneko protagonista.
Beste urte batez, kutxak bueltak emango ditu Hermandade parean, baina lehenago, arrantzaleen kofradiatik parrokiara habiatuko dira, San Pedro kalea zeharkatuta. Hiriko musika banda izango dute aurretik, Okendo martxa jotzen. Atzean kutxa eramalea joango da, Itxaso Ugartemendia, Hondarribiko hamabi arraunlariz lagunduta. Atzean arrantz untziko patroiak joango dira.
130 buelta iaz
Hiru aste geratzen badira ere, jende askok agurtu eta zoriondu du Itxaso Ugartemendia azken egunotan, Santiago egunean buru gainean arrantzaleen Kutxa eramango duela jakin zenetik. Orain Done Pedro Itsas Gizonen Kofradiaren kontu liburuak daramatzan kutxa buru gainean eramateko entrenamenduak egingo ditu. Elizatik Hermandadera eramango du Itxasok kutxa eta Hermandadera iritsitakoan bueltak ematea tokatuko zaio, ohiturak esaten duenaren arabera, zenbat eta itzuli gehiago, orduan eta arrantza hobea. Iaz, Jaione Emazabalek eraman zuen kutxa, eta ia 18 kilo buru gainean zituela, 130 buelta eman zituen. Santiago eguna berezia da Hondarribian, arrantzale familiak elkartu egiten baitira.
