Turistek euskal kultura ezagutzeko tailerrak egingo dituzte udan
Iazko arrakasta kontuan izanik, familientzako kultur tailerrak antolatuko ditu aurten ere Herriko Etxeko Kultura zerbitzuak, udan Hendaia bisitatzen duten turistentzat. Ekimenaren helburua da euskal kultura eta ondarea ezagutaraztea, baina jardunean. ...
Iazko arrakasta kontuan izanik, familientzako kultur tailerrak antolatuko ditu aurten ere Herriko Etxeko Kultura zerbitzuak, udan Hendaia bisitatzen duten turistentzat. Ekimenaren helburua da euskal kultura eta ondarea ezagutaraztea, baina jardunean. Orotara hiru ikastaro antolatuko dituzte: txalaparta, euskal kantuak eta euskal dantzak.
Txalaparta tailerrarekin, musika tresna jotzeaz gain, euskal mitologiara hurbiltzeko aukera emanen dute.
Kantu eta dantzen ikastaroek, bisitariek udan herrian antolatutako jaietan parte har dezaten erraztu nahi dute. Horrela, kantu tailerra Hendaian Kantuz ekimenari begira dago pentsatuta. Euskal dantzen ikastaroaren bidez, aldiz, bisitariek oinarrizko trebakuntza jasotzea nahi dute, abuztuan egiten den Euskal Bestan dantzatu ahal izateko .
Mendi Zolanen
Hiru ikastaroak Zokoburu auzoko Mendi Zolan kulturgunean eginen dituzte, 10:30etik 12:30era. Uztailekoak 19an, 20an eta 21ean egingo dira, eta abuztukoak, lehen asteko astearte eta asteazkenean, eta bigarren asteko asteartetik ostegunera.
Ikastaro bakoitzaren prezioa hogei eurokoa da 15 urtetik gorakoentzat, eta 14 urtez azpikoentzat, hamar eurokoa. Informazio gehiago lortu nahi duenak Hendaiako Turismo Bulegoan edo Mendi Zolanen bertan eska dezake.
