Indarkeria gaitzetsi eta elkarrizketa babestu du plenoak
“Edozein dela ere bere jatorria eta izaera, indarkeria politika egiteko edo helburu politikoak lortzeko erabiltzea” gaitzetsi zuen atzo Udalbatzak PSE-EE, EAJ, EB eta PPren aldeko botoekin. “Arbuio honek, ETA barneratzen du, pertsonen oinarrizko eskubideak eta askatasuna urratzen dituzten jokabideak erabiltzeagatik”, esan zuen EAJko Maite Peñak, mozioa aurkeztu zuten PSE-EE, EB eta EAJ alderdien izenean. Halaber, elkarrizketaren alde egin zuen plenoak “horren bidez indarkeriari amaiera emateko aukera egokia sortzen bada, berarekin bukatzeko benetako borondatean oinarrituz eta nahi hori argi eta garbi azaltzen duten jarrerak ikusten badira”. PPk ETAren indarkeria gaitzesteko mozioa aurkeztu zuen herenegungo udal osoko bilkuran, baina PSE-EE, EAJ eta EBk mozio alternatiboa aurkeztu zuten eta horrek egin zuen aurrera aurkeztu zuten hiru alderdi politikoen eta PPko bi zinegotzien aldeko botoekin. Mozio alternatiboaren helburua “adostasun ahalik eta zabalenera heltzea da sentsibilitate guztiak errespetatuta”, esan zuen Peñak. Gaineratu zuenez, “badirudi lortu dugula, gehiengoak bat egin duelako mozioarekin”. EBko zinegotzi Jose Manuel Ferradasek, udalak “gizarteak pakea lortzeko duen desioa egi bihurtzeko protagonista aktiboak» izan behar duela esan zuen. Halaber, ezberdintasunik gabe “biktima guztien sufrimendua aitortu” behar dela eta alderdi interesen arabera “azken horiek politikoki ez erabiltzeko” eskatu zuen Ferradasek. Eskubide zibil eta politikoak Bildu koalizioak ez zuen mozioaren bozketan parte hartu, bai, [...]
“Edozein dela ere bere jatorria eta izaera, indarkeria politika egiteko edo helburu politikoak lortzeko erabiltzea” gaitzetsi zuen atzo Udalbatzak PSE-EE, EAJ, EB eta PPren aldeko botoekin. “Arbuio honek, ETA barneratzen du, pertsonen oinarrizko eskubideak eta askatasuna urratzen dituzten jokabideak erabiltzeagatik”, esan zuen EAJko Maite Peñak, mozioa aurkeztu zuten PSE-EE, EB eta EAJ alderdien izenean.
Halaber, elkarrizketaren alde egin zuen plenoak “horren bidez indarkeriari amaiera emateko aukera egokia sortzen bada, berarekin bukatzeko benetako borondatean oinarrituz eta nahi hori argi eta garbi azaltzen duten jarrerak ikusten badira”.
PPk ETAren indarkeria gaitzesteko mozioa aurkeztu zuen herenegungo udal osoko bilkuran, baina PSE-EE, EAJ eta EBk mozio alternatiboa aurkeztu zuten eta horrek egin zuen aurrera aurkeztu zuten hiru alderdi politikoen eta PPko bi zinegotzien aldeko botoekin.
Mozio alternatiboaren helburua “adostasun ahalik eta zabalenera heltzea da sentsibilitate guztiak errespetatuta”, esan zuen Peñak. Gaineratu zuenez, “badirudi lortu dugula, gehiengoak bat egin duelako mozioarekin”.
EBko zinegotzi Jose Manuel Ferradasek, udalak “gizarteak pakea lortzeko duen desioa egi bihurtzeko protagonista aktiboak» izan behar duela esan zuen. Halaber, ezberdintasunik gabe “biktima guztien sufrimendua aitortu” behar dela eta alderdi interesen arabera “azken horiek politikoki ez erabiltzeko” eskatu zuen Ferradasek.
Eskubide zibil eta politikoak
Bildu koalizioak ez zuen mozioaren bozketan parte hartu, bai, ordea eztabaida prozesuan. EAJ, EB eta PSE-EEk aurkeztutako “testuaren edukiekin” bat egiten dutela azaldu zuen Garazi Lopez Etxezarretak, “baina testuak jaso beharko lukeen guztia jasotzen ez duela pentsatzen dugu. Bakeaz eta demokraziaz ari garenean, eskubideen inguruan ari gara, eskubide zibil eta politikoak errespetatu eta egikaritzeaz ari gara”. Horren harira, Espainiako Auzitegi Nazionalean epaitzen ari diren Oarsoaldeko hamasei gazteak ekarri zituen gogora Lopez Etxezarretak “horiek ere badituztelako eskubideak”.
Bildu koalizioaren ustez, “herria anitza da, eta mozio horrek ez du aniztasuna errespetatzen. Adostasuna bilatu beharrean, zatiketa bilatzen du mozioak”.
Euskal Herrian zabaldu den garai politiko berria bultzatzeko konpromisoa sorreratik hartua duela Bilduk eta “udal honetatik euskal herritar guztien eskubideen aitortza eta errespetuan oinarritutako etorkizuna eraikitzeko” lan egingo dutela gogorarazi zuen Lopez Etxezarretak.
Amaitzeko, eragile guztiei elkarrizketa politikoan murgiltzeko deia egin beharko lieke udalak Bildu koalizioaren aburuz: “Horretarako, eragile guztiek aukera berak izango dituzten elkarrizketa mahaia osatu beharko litzateke”.
