Palestinaren errealitatea hurbiletik ezagutzeko aukera, Mikelazulon
Palestinak bizi duen egoera politiko-soziala lehenengo eskutik ezagutzeko aukera izango da etzi Mikelazulo elkartean. Horretarako, hitzaldia antolatu dute Bilal A.A. Jadou gazte palestinarrarekin. Jadou, 1984. urtean Belengo Aida errefuxiatu eremuan ja...
Palestinak bizi duen egoera politiko-soziala lehenengo eskutik ezagutzeko aukera izango da etzi Mikelazulo elkartean. Horretarako, hitzaldia antolatu dute Bilal A.A. Jadou gazte palestinarrarekin.
Jadou, 1984. urtean Belengo Aida errefuxiatu eremuan jaiotako palestinarra da, “1948. urteko Nakba edo hondamendiaren ostean Palestina osoko herrietatik iritsitako herritarrek osatutako errefuxiatu eremuko semea dugu” azaldu dute antolatzaileek.
Harresiak betean jotakoa
Jadou, Dabke, Palestinako dantza tradizionaleko irakaslea da Aida errefuxiatu eremuko Amal al Mustakbal kultur gunean. Halaber, errefuxiatu eremuko haurrak eskolatzen eta kultur guneko dinamizatzaile gisa egiten du lan.
Jadouren kasua berezia da gainera, antolatzaileek zehaztu dutenez: “1967. urtean Israelek ezarri zuen harresiak bete-betean jo zuen bere sendiaren egunerokotasuna. Nekazaritza eta abeltzaintzarako erabiltzen zituzten lurren eta Aida artean ezarri zuten harresia, eta familiaren etxea harresiaren alde batean gelditu zen eta berea bestean”. Horren ondorioz, familaren etxera heltzeko egin behar zituen 500 metroak, egun checkpointez (kontrolak) betetako kilometrotako bide arriskutsua bihurtu dira.
Jadouk Europara egiten duen bigarren bidaia da honakoa. Etzi 19:00etatik aurrera emango duen hitzaldian, Palestinaren egunerokotasunaren, tradizioen eta harresiak eragiten dien kaltearen gainean mintzatuko da gazte palestinarra. “Palestinako egoera sozio-politikoaren gaineko irakurketa egingo digu eta gure kezkak partekatzeko aukera izango dugu” zehaztu dute antolatzaileek.
