Goizeko saio arrakastatsuaren ondoren arratsaldeko Mintzodromora joateko deitu dute
Laurogei lagun elkartu dira gaur goizean Irungo hiru euskaltegiek, Irun Iruten eta Betti Gotti elkarteek, Udaleko Euskara arloak eta Mendibil Merkataritza Guneak antolatutako Mintzodromoan. Antolatzaileek arratsaldeko saiora joateko animatu dute jendea...
Laurogei lagun elkartu dira gaur goizean Irungo hiru euskaltegiek, Irun Iruten eta Betti Gotti elkarteek, Udaleko Euskara arloak eta Mendibil Merkataritza Guneak antolatutako Mintzodromoan. Antolatzaileek arratsaldeko saiora joateko animatu dute jendea, euskaldun berriak zein osoak; 18:00etatik 19:00etara egingo da arratsalñdeko Mintzodromoa. Bihar ospatuko duten Euskararen Nazioarteko Egunari lotutako ekimena da, eta Gipuzkoako Foru Aldundiak babestu du.
Goizeko saioan laurogei lagunek, hiriko pertsona ezagunak batzuk eta herritar soilak besteak, ordubetez euskaraz hitezegiteko aukera izan dute Mendibil Merkataritza Guneko goiko solairuko kafetegian kafetxo bat hartzen zuten bitartean.
Deitzaileek lauko taldeak antolatu dituzte. Partehartzaile bakoitza hiru taldeetan aritu da, hamabost minutuko saioetan, adostutako gai baten inguruan solasten. Horrela, pertsona bakoitzak, ezagutzen ez dituen bederatzi lagunekin euskaraz mintzatuko da berrogeita bost minutuz; hamabost minutu talde bakoitzean.
Esan bezala, arratsaldean parte hartu nahi duenak badu aukera. Izena emateko telefonoa 943 50 51 52 da, baina antolatzaileek esan dute “telefonoz deitu gabe ere, etortzeko lasai”. Hortaz, Mintzodromoaren lehen ekitaldian parte hartu nahi eta goizeko saioan agertzerik izan ez dutenek, arratsaldeko seietan dute zita, Mendibil Merkataritza Zentroko goiko solairuan.
A! Kafeak ordainduta daude.
