Ulia-Jaizkibel itsas eremua babesteko eskaera egin du aldundiak
Ulia-Jaizkibel itsas eremua Itsas Erreserba izendatzearen aldeko adierazpen instituzionala egin zuen atzo Gipuzkoako Foru Aldundiak. Goizeko Diputatu Kontseiluan eztabaidatu zuten gaia, bi sailetik egindako proposamenari erantzunez: Berrikuntza, Turismo eta Landa Garapenekoa, batetik, eta Ingurumen eta Lurralde Antolamendukoa, bestetik. Hartutako erabakiarekin, “Gipuzkoako Foru Aldundiak ingurumen ondarea zaintzeko konpromisoa berretsi” nahi duela adierazi dute. Aldundiaren adierazpenak Ulia eta Jaizkibel mendien pareko itsas korridorea babesteko eskatzen du, 13.000 hektarea guztira. Hala, Oceana Itsasoa Kontserbatzeko Nazioarteko Elkartearen eta Euskadiko Biologoen Elkargoaren proposamen zientifikoarekin bat dator, hots, 300 kilometro koadroko korridorea sortzea Lapurdi eta Gipuzkoa artean. Atzo onartutako testuak gogorarazten du 2004an Europako Batasunak Ulia eta Jaizkibel Natura 2000 Sarean sartzea erabaki zuela, bi mendietako ekologia, geologia eta paisaia aberastasun handikoak direlako. Gainera, hainbat ikerketak baieztatu dute Ulia-Jaizkibel biodibertsitate maila altuenetako itsas eremuetako bat dela. Jaizkibelerako prestatzen ari diren kudeaketa planean itsas eremua sartzeko asmoa duela gaineratu du aldundiak. Txostenari alegazio gehiago Urtarrilaren 28an bukatu zen Pasaiako Portuaren Plan Zuzendariaren Ingurumen Jasangarritasun Txosten berriari alegazioak aurkezteko eta ekarpenak egiteko aukera. Hala, Jaizkibel Bizirik-ek jakinarazi du portuaren agiri horri 2.800 alegazio aurkeztu dizkiola, eta bestalde, Eguzki talde ekologistak beste hamasei ekarpen egin dizkio dokumentuari. Alegazio horietan Jaizkibel Bizirik-en proposamenarekin bat egin dutenek izenpetu dute kanpoko kaia [...]
Ulia-Jaizkibel itsas eremua Itsas Erreserba izendatzearen aldeko adierazpen instituzionala egin zuen atzo Gipuzkoako Foru Aldundiak. Goizeko Diputatu Kontseiluan eztabaidatu zuten gaia, bi sailetik egindako proposamenari erantzunez: Berrikuntza, Turismo eta Landa Garapenekoa, batetik, eta Ingurumen eta Lurralde Antolamendukoa, bestetik. Hartutako erabakiarekin, “Gipuzkoako Foru Aldundiak ingurumen ondarea zaintzeko konpromisoa berretsi” nahi duela adierazi dute.
Aldundiaren adierazpenak Ulia eta Jaizkibel mendien pareko itsas korridorea babesteko eskatzen du, 13.000 hektarea guztira. Hala, Oceana Itsasoa Kontserbatzeko Nazioarteko Elkartearen eta Euskadiko Biologoen Elkargoaren proposamen zientifikoarekin bat dator, hots, 300 kilometro koadroko korridorea sortzea Lapurdi eta Gipuzkoa artean.
Atzo onartutako testuak gogorarazten du 2004an Europako Batasunak Ulia eta Jaizkibel Natura 2000 Sarean sartzea erabaki zuela, bi mendietako ekologia, geologia eta paisaia aberastasun handikoak direlako. Gainera, hainbat ikerketak baieztatu dute Ulia-Jaizkibel biodibertsitate maila altuenetako itsas eremuetako bat dela. Jaizkibelerako prestatzen ari diren kudeaketa planean itsas eremua sartzeko asmoa duela gaineratu du aldundiak.
Txostenari alegazio gehiago
Urtarrilaren 28an bukatu zen Pasaiako Portuaren Plan Zuzendariaren Ingurumen Jasangarritasun Txosten berriari alegazioak aurkezteko eta ekarpenak egiteko aukera. Hala, Jaizkibel Bizirik-ek jakinarazi du portuaren agiri horri 2.800 alegazio aurkeztu dizkiola, eta bestalde, Eguzki talde ekologistak beste hamasei ekarpen egin dizkio dokumentuari.
Alegazio horietan Jaizkibel Bizirik-en proposamenarekin bat egin dutenek izenpetu dute kanpoko kaia “atentatu ekologikoa” dela, eta ez duela etorkizuneko portu jarduera bermatzen, “ez tokiko ekonomiarena, ez eta badiaren biziberritzea”. Kanpoko kaiak «alternatiba erreala» duela jakinarazi dute taldeko kideek, «egungo portua hobetuz».
Eguzki talde ekologistak, berriz, hamasei alegazio aurkeztu ditu. Eguzkirentzako Portuaren proposamena “jasanezina” da, barruko portuaren desmantelazioa bilatzen du eta Natura 2000 Sarearen Jaizkibelgo eremua deuseztea ekarriko luke. Talde ekologistak uste du ingurumen txostenak ez dituela “egungo portuarentzako ingurumen neurri zuzentzaileak proposatzen”, hala nola, Iberdrolaren zentral termikoa ixtea, Lezoko plataforma logistikaren balizko kalteak, eta arrantzan eta turismoan izango lukeen eragina.
Eguzkiren ustez, egungo kaiak etorkizuna du, “egungo kaia moldatu eta ingurumen hobekuntzak ezarriz, eta Bilbo eta Baionako kaien jarduera osatuz”. Ulia-Jaizkibel korridorea Itsas Erreserba izendatzeko galdegin du Eguzkik ere.
