PPk udalerria biziberritzeko eta enplegua sortzeko 700.000 euro eskatu ditu
Pasaiako Partido Popularrak emendakinak aurkeztu dizkio aste honetan udal gobernuak aurkeztutako aurrekontu aurrerapenari. Popularrek proposatu dituzten neurrien artean 690.000 euroko partida bat dago, “udalerriko biziberritzerako eta tokiko enpl...
Pasaiako Partido Popularrak emendakinak aurkeztu dizkio aste honetan udal gobernuak aurkeztutako aurrekontu aurrerapenari. Popularrek proposatu dituzten neurrien artean 690.000 euroko partida bat dago, “udalerriko biziberritzerako eta tokiko enplegua bultzatzeko”.
Krisi garaian “enpleguaren helburua utziezina» dela adierazi du popularren bozeramaile David Fernandezek. Gainera, udalaren gastua bide publikoa hobetzera ere bideratu behar dela adierazi du Fernandezek: “Ondasun amankomuna da, hiritar guztiek erabiltzen dutena”. Hala, proposatutako partida horren zati batekin espaloiak konpondu, galtzadak berritu eta etxebizitzetako aurrealdeak garbitzea proposatzen du PPk, «batez ere Antxon, Trintxerpen eta San Pedron”.
Horrez gain, diru kopuru horrekin «helburu soziala» bilatzen dutela argitu du Fernandezek: “Lanik gabe dauden herritarrentzat behin-behineko enplegua sortzea ere bilatzen dugu, batez ere lan merkatuan barneratzeko zailtasunak dituztenentzat”.
Beste arloetatik
Partida hori sortu ahal izateko, beste arlo batzuetatik aurrekontua murriztea proposatu du Pasaiako PPk: “Udal arlo guztiek orain arteko aurrekontuan izan duten kantitatea gehien jota izan dezatela”. Horrez gain, zenbait gastu murriztu nahi dituzte popularrek, hala nola, publizitatean, protokoloan, ikastaroetan, jantzietan, eta %20 udal langileen dieta eta garraio gastuetan.
Zinegotzi popularrak onartu du murrizketak egitea “ez dela gauza erraza”, baina enplegua eta udalerriko bide publikoen biziberritzea udalarentzat “lehentasun” izan behar duela gaineratu du.
