Udal beilatokiaren aurreproiektua prestatuko dute aurten
Hondarribiko Udaleko Hirigintza sailak 1,3 milioi euroko aurrekontua du aurten. Zati bat, Domingotxonea Udal hilerriko jardin gunean egingo duten Udal beilatokiaren aurreproiektua idazteko izango da. Hala azaldu zuen herenegun Aitor Kerejetak, Hondarri...
Hondarribiko Udaleko Hirigintza sailak 1,3 milioi euroko aurrekontua du aurten. Zati bat, Domingotxonea Udal hilerriko jardin gunean egingo duten Udal beilatokiaren aurreproiektua idazteko izango da. Hala azaldu zuen herenegun Aitor Kerejetak, Hondarribiko alkateak, saileko aurrekontuak aurkeztu zituen prentsaurrekoan, “krisi garai honetan, Udal asko oso egoera gogorra bizitzen ari diren honetan, esan dezakegu Hondarribiak 6 milioi eurotik goiti inbertituko dituela 2012 urtean, eta horietatik 4,2 milioi Hirigintza Departamentura joango direla. Hori hala da, hain zuzen ere jarraitzen dugun irizpidea zuhurtasuna delako eta duela urte askotik hona dugun dirua baino gehiago gastatzen ez dugulako Hondarribian”.
Ideia argia
Kerejetak azaldu zuenaren arabera, beilatokia eraikitzearen proiektua argi daukaten ideia da, “eraikina nolakoa izango den eta ze zerbitzu eskainiko dituen jakiteko aurreproiektua prestatuko dugu aurten, eta errauste labea egiteko aukera aztertuko dugu”.
Inbertsio nagusiak Zuloaga eta Itsasargi kaleak berritzeko izango dira, 3,5 milioi eurorekin. Gainera, 336.700 euro jarriko dituzte Muliate hiritartzeko, 30.000 euro Ramon Iribarren ibilbideko ezpondaren egoera aztertzeko, eta 18.500 euro beilatokiaren aurreproiektua egiteko.
