Trapujale gaur jaitsiko da Martizkone baserritik Lezora
Gaur, ostegunzuriarekin batera helduko da Trapujale Lezora, eta berarekin inauteriak. Iristen lehena, Trapujale Txiki izango da, eta Lezo Herri Eskolan ongietorria egingo diote ikasle eta irakasleek arratsaldeko lauretan. Arratsaldeko zazpietan irtengo...
Gaur, ostegunzuriarekin batera helduko da Trapujale Lezora, eta berarekin inauteriak. Iristen lehena, Trapujale Txiki izango da, eta Lezo Herri Eskolan ongietorria egingo diote ikasle eta irakasleek arratsaldeko lauretan.
Arratsaldeko zazpietan irtengo da, berriz, Trapujale Martizkone baserritik eta ondoan Alde Zaharreko joaldunak izango ditu. Pregoia eta arranpuilaren ostean, Trapujale Saria banatuko dute udal areto nagusian. Aurten, Martizkone baserriak jasoko du oroigarria, “urte hauetan emandako laguntzaren aitorpen modura”, azaldu dute antolatzaileek.
Ostiralorian ikasleak nagusi
Bihar goizean, berriz, ikasleak izango dira inauteri jaietan nagusi. Lezo Herri Eskolako eta Institutuko ikasleek kalejira egingo dute herri osoan zehar 09:30ean hasita, eta ordubete beranduago, Bidai bat historian zehar emanaldia egingo dute Bekoerrota kiroldegian. Bestalde, Pasaia Lezo Lizeoko ikasleek, Trapujale Festa, euskal inauterietako dantzen emanaldia egingo dute 10:45etik aurrera Gurutze Santuaren Plazan, eta hamaiketakoa eta trapu jolasak ondoren.
Akelarre Gauarekin osatuko dute biharko egitaraua, Euskal Dantzazaleak taldeak antolatuta 20:30etatik aurrera. Bukatutakoan, triki poteoa egingo dute herriko tabernetan barrena eta jaia giroarekin jarraitu nahi duenak, Uztarria tabernan egingo duten barrikotean emango ahal dio segida. Barrikoterako txartelak 15 euroan daude salgai
