Bildu: “Elkarbizitzaren eta politika egiteko modu berrien bidean jarraitzeko deia egin nahi diegu alderdi politikoei”
Bildu: "Elkarbizitzaren eta politika egiteko modu berrien bidean jarraitzeko deia egin nahi diegu alderdi politikoei"
PSE-EEk aurkeztu berri duen Noski aldizkarian azaltzen diren baieztapenen harira, “enfrentamendura baino eramaten ez duten akusazio eta ezeztapen dinamika batean” ez dela sartuko adierazi du Bildu koalizioak, “ulertzen dugulako hori dela gizarteak eskatzen diguna”. Alderdi sozialistak Errenteria-Oreretako buzoi guztietan banatu duen aldizkariak “asmo elektoral argia” duela, eta “errealitatea” ez duela islatzen salatu du alkatzetzan den alderdiak. Horren harira, “manipulatuta” dauden datuak, testuingurutik kanpo nahita kokatutako adierazpenak, eta hainbat irudi helburu “propagandistikoetarako” bakarrik erabili izana leporatu dio Bilduk PSE-EEri.
Orain urtebete alkatetzara heldu zenetik, herria agertoki berri batera eramateko udal gobernuak “maila guztietan eragiten diguten oinarrizko arazoei erantzuna emateko”, egiturazko aldaketak egin dituela gaineratu du Bilduk helarazitako prentsa oharrean: “Hala nola, maila ekonomikoan, sozialean, politikoan, kulturalean eta elkarbizitzakoan. Horretarako hainbat proiektu egin dira eta egingo dira eta horien artean Errenteria 2025 Plan Estrategikoa nabarmendu nahi dugu, udazkenean herritar eta eragileen parte hartzearekin diseinatu eta herriarentzat inflexio puntua suposatuko duena”.
Ardura politikoa
Errenterian beharrezkoa den aldaketa politikoak ikuspegi eta ardura politikoa eskatzen duela guztien aldetik esan du Bilduk bestalde, eta” ideien elkar trukeak, herriaren eraikuntza ulertzeko modu ezberdinek edo diferentzia ideologikoek ere, maila politikoa Errenteriako PSE-EEk nahi duen mailara jeistea” ez duela suposatu behar gaineratu du.
Horrenbestez, eta azken urteetan “elkarbizitzaren bidean eta politika egiteko modu berrietan aurrera nola egin den ikusita”, arku politikoko alderdi politiko guztiei “bide horretan jarraitzeko” deia egin die Bilduk, “hori delako gizarte honek eskatzen diguna”.
