Etzi Baionara joateko deia egin du Herrirak
Etzi Baionara joateko deia egin du Herrirak
Etzi Baionan euskal presoen eskubideak errespetatzeko galdegingo duen manifestazioarekin bat egitera deitu ditu herritar guztiak herri bilguneak, “preso eta iheslari politikoak sufritzen dituzten neurri bereziekin bukatu beharra dagoelako”. Horren harira, herritarrei lekukoa hartu eta “gobernuei urratsak exijitzeko” eskatu die Lezoko Herrirak, “eta horretarako aukera dago larunbat honetan Baionan”.
Autobusak antolatu dituztela jakinarazi du herri bilguneak, eta interesdunek Tiñelun eman dezakete izena.
Herrira Eguna jendetsua
Euskal preso eta iheslarien eskubideen alde urriaren 27an egindako Herrira Egunaren gaineko balorazio “baikorra” egin du bestalde herri bilguneak: “Eguraldiak lagundu ez bazuen ere, ekimen guztiak egin ziren eta parte hartzea ederra izan zen guztietan” . Besteak beste, bazkariaren bueltan bildutako 140 lagunak eta ekitaldi nagusian elkartutako 200 lagunak nabarmendu dituzte bilguneko kideek.
Aipamen berezia egin diete eguna aurrera ateratzeko lanean aritu ziren 60 boluntarioei eta eskerrak ematearekin batera, zoriondu egin ditu “egindako lanagatik”.
Datorren urterako preso eta iheslarien eskubideen aldeko eguna errepikatzeko asmoa azaldu dute azkenik Herrirako kideek.
