Iban Angulo txakurkroseko Espainiako txapeldun izan da
Hasi da txakurkros denboraldia, eta Txakurkrosa Oarsoaldean taldeko kideek ongi baino hobeto hasi dute. Iban Angulok urrezko domina lortu du asteburuan Espainiako txapelketan. Naiara Casi ere bikain ibili da eta brontzezko domina lortu du. Biek 5.200 metro egin behar izan zituzten.
Aurretik, Nafarroako txapelketan ere bigarren izan zen Casi, eta Burgoseko Espainiako Kopan bigarren iritsi zen Angulo ere. Beste taldekide batzuk, berriz, Bergarako txakurkrosean hartu zuten parte, eta honako hauek bigarrenak izan ziren bakoitza bere mailan: Jose Mari Altuna, Aida Males eta Angel Diaz. Bergarako lehian Angulok ezin izan zuen lasterketa bukatu erorketa baten ondorioz, baina hori ez zen oztopo izan Espainiako Txapelketan parte hartzeko.
Txakurkrosa Oarsoaldean taldetik aurreratu dutenez, Angulo aita izan da bigarren aldiz azaroan, eta beste semea gaixorik egon da ospitalean: “Hala ere, Ibanek [Angulok] denbora atera du gauez entrenatzeko, eta gainera, oztopo guztiak gainditu, eta berriro urrezko domina irabazteko, zoriontzekoa da kirolari honen dedikazioa eta bere familiaren laguntza”.
